Saturday, December 27, 2008

بين الحلال والحرام .. هناك علامة استفهام؟




صباحكم ورد وياسمين

أصبح المغازل هو الشغل الشاغل والهم الاكبر.. من عمر واحنا مثل ما احنا ما فينا الا العافيه

ماهو الجديد في موضوع لجنة الأمر بالعروف والنهي عن المنكر؟
هل المنكر متروس بالشوارع؟

لي شفت البنت لابسه مش ولا بد .. شبتقول !! لبسي عدل ؟
بتسمع كلامك البنت؟


اللي أتوفعه .. جان قبل في مشاكل نسمع عنها .. أتوقع الحين بيصير طق مطاقق جدام عيونا



أنا ماني ضد الاسلام ودينا .. بس هم مو معقوله تعال شغلتك انت اتحاجي فلان وتحاجي علان يا تسمع لك كلمة مني ولا مناك ولا داش هوشه ومتكفخ فيها


ساعات بدال لا نحل المشاكل .. انكبرها .. وهذا اللي قاعد يصير المشاكل قاعده تكبر


لــــي ويــــن بنوصـــــــل؟









********
همســـــــــــــه
نستطيع الخروج من أعمق بئر
فقط
يجب أن لا نتوقف ولا نستسلم
..مهما شعرت ان الاخرين يريدون دفنك حيافقط لاتستسلم...فالقمة والنجاة هي الهديه التي تنتظرك..رغم انف كل من القى عليك يوما حجرا لمنعك من الوصول

Monday, December 22, 2008

تخــــاريـف






صباح بارد .. ونسمات تلامس خدي الدافىء

مكتب هادىء أنظر الى شاشة الكمبيوتر وأسرح في خيالي .. كالفراشة هي مراحل حياتي تاره أعلو وتارة أهبط

يدخل موظف الى مكتبي وهو يبتسم ويقول : صباح الخير
واي مي : صباح النور


أسرح في تلك الابتسامه .. أصبحنا لا نتعامل بها كثيرا في هذا الزمن القاسي .. وحتى لو ابتسم شخص أكيد بيناديه الشخص الثاني تعال انت ليش تبتسم او لا لا لا انت ليش تضحك شتضحك عليه في شي يضحك

والطرف الثاني طبعا بينصفق ويهه من الطرف الأول .. وبيندم ليش ابتسم



أعود من مخيلتي الى مكتبي وأسرح بفنجان قهوتي .. واذا بمخيلتي تأخذني في المقهى حيث التقينا
حيث تخاطفت تلك النظرات مصاحبة معها نبضبات .


أحسست بنبضه ووبهمسه مصاحبه معها ابتسامه أسرتني







ويرن هاتف مكتبي حتى يأخذني من تلك اللحظه الجميله .. واذا بالمتصل يقول

المتصل : إزيك؟
واي مي : انا بخير
المتصل : بس تعرفي انا معرفكيش .. ازاي كدا معرفكيش
واي مي : مو الا اتعرفني.. آمر
المتصل : يانهار مش فايت .. ميصحش لازم أعرفك
واي مي : النهار حيفوت سواء عرفتني ولا ما عرفتني بس اخلص اشتبي
المتصل : ماهوووو ميصحش ما عرفكيش بأ
واي مي :ليش؟
المتصل : علشان اللي ماعرفهوش أتعرف عليه بأ
واي مي : ولين انا واي مي يابني ما تخلص بأ
المتصل : اتشرفنا بس أنا أد أبوكي ابنك دا ايه
واي مي : ماراح تفرق وايد ترا يلاااااا اخلص
المتصل : بصراحه بصراحه أنا غلطان بالرقم الداخلي
واي مي : ياسلام
المتصل : وألت آهي فرصه أعرف انتي مين
واي مي : خل أحولك على البداله وايد أحسن وتتعرف عليهم هناك : )



وهنا اختفى خيالي .. وحيده مع فنجان قهوتي




*********
همســـــــــه

لفتني يداه ذات مساء

كأقواس الياسمين

انحنت تزيل أنات الحنين

شوقي لهمسه

تدثر بطيات القرب

طاب اللقاء و الوقت تبعثر






Saturday, December 13, 2008

منــــو انتــــوا ؟؟






صباح الورد .. وصباح النسمه الحلوه البارده




دشيت المسنجر امس بعد انقطاع .. ولا أشوف اشكثر ناس اون لين معاي

اشتغلت عاد انا

امبيه هذيله منو ؟
انت منو ؟
وانتي منو ؟
لا صج والله بليز انت منو؟


عصبوا علي أمس بغيت أنطق .. بغوا يطلعون لي من الشاشه لوووول

ترا من صجي انا ما أتذكر .. شنو هذا صار عندي مسح ذاكره مو فقدان :/



في رأيي الشخصي والحمدالله ان نص الاصدقاء اللي تعرفت عليهم من النت ناس محترمين أكن لهم كل تقدير وحب واحترام .. تبون الصج

ساعات أحس الناس الي اتعرفهم عليهم من النت فيهم خير اكثر من اللي اتعرف عليهم برا النت .. مادري اهي صدفه ؟ او اهي شنو بالضبط ؟ انا ما ادري بس هذا اللي صار وياي


فئه كثيره من الاصدقاء اللي تعرفت عليهم من خلال النت .. فيهم وايد وايد احترام وحنان وروح الاخوه
فيهم اللي يحاتيك واللي يسل عنك
فيهم اللي يحب
وفيهم اللي ينصحك وما تهمه الا مصلحتك
فيهم اللي تستفيد من تجربته


تقريبا أصدقاء النت .. أصدقاء بلا حدود من حيث الاعمار والافكار المختلفه ورغم هذا اتصير صادقه

عكس خارج النت تماما او خلينا انقول قليلا .. لان عن تجربه شخصيه مو كلهم فيهم خير


هذا حوار دار بيني وبين رفيجتي .. وقلت خل أخذ رايكم في .. شرايكم انتوا بربعكم وأصدقائكم اللي بالنت فيهم روح الصداقه الصدوقه ؟


****

همســــــه
صباحك ورد .. صباح النسمه الحلوه اللي تعطر نكهته قهوتنا

Monday, December 8, 2008

عيــدكــم مبــارك
وعســـاكــم تعـــودونــــه

Monday, December 1, 2008

ليـــالي شتـــويه




سماء تملأها الغيوم .. ونسمة هواء بارده
قطرات متطر متساقطه

تبقى هنا لوحدها تراقب أوراق الشجر المتساقطه .. مع كل نسمة هواء بارده تتساقط ورقه


آآه الى أين انتي ذاهبه أيتها الورقه .. لا تذهبي فأنا هنا لوحدي
تراقب تلك الورقه تطير مع تلك النسمه وتسقط على سطح البحيره


وتغيب الشمس .. ويحل الظلام ويعم الهدوء

وحدها مع فتجان القهوه .. ونسمة الهواء تداعب شعرها

يرن هاتفها .. وتبتسم ابتسامه خفيفه




هي : إسهر معاي
هو : الناس يقولون ألوو قبل
هي : أقولك إسهر معاي
هو : مابي
هي: بليز
هو: مابي مابي
هي : أحبك
هو : هني ما اقدر أقاوم .. يبا لج اللي تبينه لو تطلبين عيوني
هي : تسلم عيونك الحلوه
هو: يسلمج .. سهرانه اليوم .. شعنج؟
هي : الليله حلوه
هو: كل الليالي حلوه معاج
هي : بعد عمري
هو: الله المطر له والليل والنسمه الحلوه معاج
هي : قصدك يا حلو هالليله معاك انت
هو: معاج
هي : لا معاك
هو: اقولج معاج
هي : مابي معاك انت

يعم الهدوء بينهما

هو: أحبج
هي : : )
هو: لا تسكتين .. أقولج أحبج
هي : ترا أستحي
هو : قوليها
هي : بس عاد
هو: بتقولينها ولا
هي : لا لا خلاص
هو: قوليها
هي : أحبك .. أحبك .. وما أقدر أعيش من غيرك
هو: بعد عمري .. ولا أنا أقدر
هي : الليله وايد برد
هو : تبردين وأنا معاج
هي : حبيبي مستحيل أحس بالبرد وانت معاي



استمر حديثهما الرومانسي في تلك الليله .. كانت تلك الليله من ليالي شتويه بارده تغطيها الرومانسيه


لماذا ترتبط تلك الليالي الشتويه بالرومانسه ؟؟



هذا البوست من
تأليف وتمثيل واخراج .. بنات أفكاري


******
همســــــه
أدري ما بلقا بدالك .. لا تفارقني

Thursday, November 13, 2008

هــدوء









هدوء فيني هدوء .. وانعزال
ليش ؟


هل هو الهدوء الذي يسبق العاصفه؟
ولا هدايه من الله .. ؟؟


بس معروفه انا مزعجه في البيت اشفيني !! انا مو انا انا متغيره على نفسي

فهمتوا شي !!






==

Soon

لــيالي شتــويـــه



==

مدونه تستحق القراءه والتشجيع مدونه هداف


http://hddaf.blogspot.com/

Sunday, November 9, 2008

فـــي ذلــك الزمـــان




في ذلك الزمان .. يوجد زهره

زهرة تنبع بالأمل والوفاء.. ترويها الكلمه الجميله الكلمه الحلوه
تضيىء بالاخلاص والكلام الطيب
تشع بالنور والابتسامه

تلك الزهره كانت تعيش وسط عائله جميله .. تحتويها الكلمه الطيبه



وفي يوم استعارت صديقتي تلك الزهره نظراَ لجمالها ونورها ورونقها
عاشت تلك الزهره في ذلك البيت
الذي يغمره الجشع ويغمره الطمع .. عاشت تلك الزهره على الكلمه المره والوجوه العبسه


رأيت زهرتي تذبل .. عذراَ يازهرتي لم أعرف أنني أخطأت في حقك حين أعرتك

كذلك نحن البشر حالنا كحال الزهره .. نتصافا بالكلمه الطيبه ولكن الله يرحمهم مو موجودين الحين





تلك الزهره في ذلك الزمن عاشت و ماتت .. كذلك نحن البشر غابت عنا الكلمة الطيبه الوجوه السمحه .. كل ما أراه هو وجوه عابسه وكلمه لاذعه وصرخه مزعجه ونفس أنانيه هكذا أصبح البشر في هذا الزمن

Thursday, November 6, 2008

الحــــريه .. شنو تبي بالضبط !!




في عالم حر
في عالم أنت فيه


حيث الفكر .. حيث الطرح.. حيث النظر

ماهي الماده التي تود طرحها؟


ما هو رأيك في انسان يسىء للحريه باسم الحريه؟
برأيك ماهي العقوبات التي يجب تطبيقها لمن يسىء للحريه؟



*************
سؤال فني ... لهذا البوست

ماهي مقومات الحريه؟
عندنا حريه ؟؟
!!

Sunday, November 2, 2008

التعليــــم .. إلـــى متــى






حدث في مثل هذا اليوم


في جامعه خاصه في غرب مشرف

كان في دكتور يدرس فاونديشن .. وكانوا طالباته مواظبين على الدراسه طبعا هالدكتور مألف كتاب عن اللغه الانجليزيه

شصار اتوقعون !!


روح يالدكتور وقول لطالباتك .. عندكم امتحان والامتحان كله من كتاب انا مألفه ولازم تشترونه علشان تدرسون عدل

طالبه من الطالبات : دكتور والكتب اللي شارينها ؟
الدكتور : انا قاعد اسهل عليج الامتحان واقولج راح
ايي من هالكتاب اتقولين لي والكتب اللي شريتوها !؟

طبعا الكلاس في 20 طالبه والكتاب سعره 10 د.ك ولازم كل طالبه تشتريه عشان تدرس منه وتنجح بالامتحان .. ويأ وقت الامتحان ودرسوا البنات و والامتحان كلش كلش ماله شغل في الكتاب اللي الدكتور كاتبه

!!


ضاق خلقهم البنات وقالوا خل انروح انحاجي الدكتور

الطالبه : دكتور انا جني عفست الدنيا في الامتحان
الدكتور : انتي شريتي كتابي؟؟
الطالبه : أي
الدكتور : خلاص عيل لا تحاتين



الحين حسبتكم معاي .. الكلاس في 20 طالبه والكتاب 10 د.ك ألزم الدكتور كل طالبه تشتريه .. الدكتور يدرس خل انقول أضعف الايمان كلاسين الصبح وكلاسين العصر

وكل كلاس فيهم يجبر طلابه انهم يشترون كتابه هذي تقريبا 800 د.ك داشه جيبه




شنو هذا !!

ممنوع منعا باتا أي دكتور يبيع كتبه بالجامعه .. ليش صار التعليم جذي انا ارفع درجاتك اذا شريت كتابي ؟؟ لا خوش مربي اجيال انت


==
أذكر يوم كنت برابعه ثانوي .. أبلة الاحياء ادش الصف ترفس الباب لاحظوا انها ما تفتح الباب لا ترفس الباب ومن الخرعه كلنا نوقف تسلم عقب تشرح لها سطرين عقب اتقول


" ما فيش حصه النهرضه بس انا تعبت انا مخنوئه "


زين احنا شكو !! شكو المدرسه ادش الصف وادش معاها مشاكلها الشخصيه ؟؟

متى نرتقي بالتعليم ؟

بالتعليم ترقى الامم واحنا قاعدين نسمع مشاكل المدرسات قبل والحين يبوقون عيالنا بالجامعات الخاصه

!!


*********
سؤال فني.... لهذا البوست


شنو الخطه اللي لازم تمشي عليها وزارة التربيه علشان نوصل لتعليم راقي من غير مشاكل ولا بوق ؟؟



Thursday, October 30, 2008

أنــــــت





أنا وأنت عاشقان لليل
أنا وأنت عاشقان للمطر


أنا وأنت جمعنا فنجان قهوة
أنا وأنت جمعتنا ابتسامه مع نسمة هواء رقيقه


أشعر بالهواء يراقصني .. فأنت الهواء وأنا تلك الزهره الراقصه
ترقص على أنغام صوتك .. على أنغام ضحكتك .. على أنغام ابتسامتك






راقصني انت الموسيقى التي أعشقها
راقصني انت البستان وانا الزهره
راقصني انت البحر وانا حوريتك
راقصني انت سمائي وانا غيمتك
راقصني انت القهوه وانا قطعة السكر
راقصني انت الهواء البارد وانا نسمتك
راقصني انت الليل الهادىء وانا نجمتك





أنا سحابة المطر .. وأنت السماء تحضنني










********

همســـــــــه

يسمعني حين يراقصني .. كلمات ليست كالكلمات

Tuesday, October 28, 2008

الأقــــرع فـــي البقــاله


اليوم : الخميس
الساعه : 3:00 فجرا
الموقع : غرفته المعفوسه




طبعا الأقرع مو وايد يحب يشبك انترنت فمقزرها ديل اب .. وكان شابك ام اس ان مع ربعه اللي يدرسون برا اللي في لندن واللي في دبي واللي في امريكا

وكلهم متيمعين على الام اس ان مستانسين ويقرقون فجأه ومن غير سابق انذار خلص الكرت

!!


الاقرع : لاااااااااااااا مو وقته مو وقته


تصرف الاقرع بسرعه لبس ودق سيارته سلف وراح اقرب بقاله

صف سيارته ونزل البقاله

الاقرع : عندك كرت انترنت
راعي البقاله : ما كوو بابا
الاقرع : اوكي


حرك سيارته الاقرع وراح بقاله بعيده اشوي وصف سيارته
وراح الاقرع البقاله .. طبعا يتلفت يمين يتلفت يسار ماكو احد

الاقرع : يه شسالفه !! وين اللي يشتغل ؟؟

اشوي شاف واحد مصري ويهه مصفوق .. وقف يسأل الاقرع

راعي البقاله : أيوه يابني عاوز ايه
الاقرع : وينك الله يهداك ؟؟ ابي كرت ديل اب انترنت عندك


راعي البقاله : مالي هو انت بتسألني مالي ؟؟ دا دلوؤتي جيـــــه واحد وسرئني انا اتسرئت

الاقرع : شنو !! منو هذا اللي باقك ؟؟
راعي البقاله : معرفش معرفش
الاقرع : زين عيل يلا باي

راعي البقاله : ايه رايح فين مش عاوز كرت
الاقرع : لا مابي يمعود هونت .. مالي خلق يطلع الحرامي اللي بايقك ابويهي


راعي البقاله : لييييييه هو انت خايف ؟؟ انا كمان خايف

الاقرع : شنو خايف .. لا لا مو خايف روح دق على الشرطه ودبر عمرك

راعي البقاله : حتسبني لوحدي ؟
الاقرع : يه شفيك ؟؟ هو انا خلفتك ونسيتك يابني؟؟

راعي البقاله : دانا أد جدك ... ابنك دا ايه ؟
الاقرع : عيل كبر يدي وخايف ؟؟ ترا مالي خلقك تالي الليل طالع لي انت بعد باي


رد البيت الاقرع


وكنت انا بشرب ماي .. شفت الاقرع توه داش البيت

واي مي : شنو كنت سهران ؟؟
الاقرع : لا أي سهران .. كنت احاجي ربعي بالام اس ان وخلص كرت نزلت البقاله بشتري كرت ولا راعي البقاله بايقه حرامي .. جان اخترع ويهه اصفر مصفوق

واي مي : وليش اخترعت ؟؟ كل يوم اتروح النادي تشيل حديد وحالتك حاله والحين اخترعت .. قرعان اخر زمن

الاقرع : يامعوده والله فاضيه انتي لو مكاني كنتي بتسويين نفس الشي

;pp







Monday, October 27, 2008

ســاعات أفصل







الأيام حدها مليقه .. بس أبي الأيام تمشي ليش اشناطره اهو انا ناطره شي وشي مهم وايد بس انا يعني هم لازم استانس في هاليوم مو شرط عاد علشان ناطره هذاك اليوم يقوم اليوم ما يمشي عندي وطويل وحده مليق l

أقعد من النوم .. وأشوف موبايلي وأدق لانها داقه علي 19 مس كول

واي مي : ألوو
رفيجتي : أهلين .. انتي وينج حرقت تلفونج كل هذا نوم
واي مي : شسوي .. شعندج ؟
رفيجتي : يلا يلا قهوه ابي اشرب قهوه
واي مي : يلا اشورانا



أروح الكوفي شوب أشوف رفيجتي و أشوف رفيجاتي ورفيجات رفيجاتي ورفيجات ما اعرفهم بعد مالي خلق تعارف أوووووله كل هذيله داقه عليهم .. مسويه حفله
!!


يلا عديتها خل اشوف اشلون ما استانس اليوم .. أقعد وياهم

فلانه : شفتي المحل الفلاني شنو عنده
الثانيه : أي عجيب حده
واي مي : افف انتوا ملاقه
رفيجتي : ياحبج للتحلطم
واي مي : ابي اكشن
فلانه : واي مي بس عاد شنو اكشن شتبين ؟؟ تبين اتسوقين طياره
واي مي : ليش لأ على الاقل شي يديد
رفيجتي : سكنهم مساكنهم اشتغلت



اشوي


دق تلفوني

واي مي : ألوو
الاقرع : هلوو
واي مي : اهلين بالقرعان كلهم هلا والله

فلانه حسة برزة الويه العجيبه

فلانه : أخوج الاقرع ؟؟ سلمي عليه
واي مي : فلانه اتسلم عليك
الاقرع : الله يسلمها .. تروحين مطعم
واي مي : مممم مادري مالي خلق
الاقرع : يلا امشي
واي مي : لا لا مالي خلق بقعد ويا رفيجاتي .. شوفلك رفيق اخر

فلانه قاطه اذنها ويانا

فلانه : انا أروح وياه

سمعها الاقرع
الاقرع : رفيجتج مليييييييقه
واي مي : أدري لووووول
فلانه : تضحكون على شنو
واي مي : ولا شي

الاقرع : عيل يلا أروح أشوفلي واحد يروح معاي المطعم سي يو
واي مي : اوكيك سي يو





يتبع ....


فصله من فصلاتي

هذي القصه فيها من الواقع + مزج من أفكاري المينونه وتابعوني



********

همســــــــه
تهمني طبعا حبيبي تهمني .. انت بس اللي بعمري هزني

Friday, October 24, 2008

مـــواقــف !!





البنت : يما هذي اخر سنه لي بالثانوي
الام : أي يابنيتي درسي وركزي الله يوفقج

البنت وهي في انفعال شديد وغضب على تشجيع على مصدقه عمرها .. وبصوت عالي




البنت : يارب أنجح يارب أنجح يارب يارب يااااااااااااااااااااااااااااااااارب

الام : هاااااو غصب


البنت : يــه يما لا تفاولين علي



==


منى ومنال .. خوات

منى مو متزوجه .. ومنال متزوجه وعندها بنتين و ولد
وراحت المستشفى اتسوي تحليل لانها شاكه انها حامل


منال : هذا التحليل
الدكتوره : مبروك انتي حامل
منال : شنهووووووووووو مابي مابي لييييييييييييييييش مابي

وأخذت منال تبكي وتبكي
منى : ما تدرين يا منال يمكن هالولد في خير اشفيج فضحتينا
منال : بس انا تعبت ابي اشوف حياتي اشوي



الدكتوره خذت منال على صوب وسكرت باب مكتبها

الدكتوره : منال ليش هالبجي انتي متزوجه ؟؟




==


نوره داقه على البداله عندها حفلة في البيت بتسويلها وبتاخذ الارقام


نوره : ألوو يعطيك العافيه اخوي
البداله : هلا اختي آمري

نوره : بغيت مطعم .. ومطعم .. ومعطعم
البداله : خلج معاي على الخط دقيقه .. اتفضلي اختي الارقام

نوره : بغيت بعد الله يعافيك مصور .. ومصور .. ودي جي .. ودي جي ..

البداله : أووووووله على هالمطاعم انتي عازمه قبيله .. اختي انا معزوم

نوره


!!



****************

همســـــــــه

شفتك ولا حطيت .. عيني بعينك

Thursday, October 23, 2008

ذاكــــره فـــي صـــدمـــه






أسطر دموعي على ورق
أسطر ضحكاتي على ورق
أسطر أيامي على ورق
أسطر فرحتي على ورق




عذرا ياذاكرتي فأنا أمارس الضغط الشديد عليك لكي تذكريني بتلك الأيام
أيام كنت أخالها فرص فضيه .. لكنها فرص ذهبيه

أسطر أيام جميله خلت لوهله أنها أيام ستدوم
أسطر أيام خلت بأن فيها صديقا صدوقا






ماذا !! ضاعت مني فرص

لماذا ؟؟


لماذا ضاعت تلك الفرص ؟ أين كنت؟ بماذا كنت أفكر حينها ؟


حاولي أن تتذكري تلك الأيام ... وتلك الفرص بين زوايا غرفتي الهادئه
حاولي تذكر أيامي الجميله .. لا أتوقع بأنكي تودين تذكرها ولا أنا أيضاَ




***********
همســــــــــه

وإني وإن كنت الأخـــير زمانه
لآت بما لم تســــتطعه الأوائــل



Wednesday, October 22, 2008

يـا حلــو يــوم الاربــعا




يوم جميل .. جميل من غير سبب
يوم يعطي الأمل
يوم هادئ



عندما تشعر بالراحه من دون سبب .. وفرحه تغمرك
عدما ترى الناس جميعا سعداء .. فقط لأنه يوم الأربعاء

أنا أعشق هذا اليوم من كل أسبوع من غير سبب



==


ليـــــش يقـــولــــون




حب الرجال كالكتابه على الماء ... وإخلاصهم كالكتبة على الرمال

عندما تكره المرأه الرجل إلى درجة الموت ... فاعلمو أنها كانت تحبه إلى درجة الموت

في الحب : الرجل مهاجم ... والمرأه مدافعه



==

مـــوقف



كان دوامي يم شركات التداول للأوراق الماليه

وكنت رايحه متأخر الدوام والمكان هدووء صخه .. ولا فجأه أسمع ناس يصفقون


واليوم اللي عقبه كنت مستأذنه من الدوام ولقيت سيارة اسعاف صافه

!!



المفروض أصحاب القلوب الضعيفه ماله داعي يتداولون






************
همســـــــــه

وإن غداَ لناظره قريب

Tuesday, October 21, 2008

أولها دلــع .... وآخرها ولــع





واي مي : أفف صج انا اليوم معصبه ومالي خلق شي

صديقتي س : شنو شنو شنو واي مي معصبه .. ولا يهمج عندي لج حل عجيب نروح الحين واخذ احلى شيشه


واي مي : شنو ؟؟ لا يمعوده مابي مابي مو لي هدرجه .. وبعدين تعالي انت متى تبطلين هالعاده اللي مو شي كلش يبا موشي تقلل من أنوثتج

صديقتي س : أي شي شكو اتقلل م انوثتي .. احلى شي لما الواحد يكون معصب وياخذ له شيشه يروح عالم ثاني .. بس احس اطلعت لي كرشه مادري ليش منها جنه الكل يقولي


واي مي : مو الناس مره بالاسبوع انتي مرتين باليوم شنو هذا ؟؟ ما تحاتين ضروسج ماتحتين صحتج ولا جسمج يا يبا اشفيج ؟ ليش جذي

صديقتي س : مادري اذكر قبل كنت اقول حق ابوي عفيه بس مره وحده وكان يقولي يابنيه اولها دلع واخرها ولع يووزي وانا اقوله بس هالمره عفيه عفيه ليما ادمنت
الحين


واي مي : ولع منو ؟

صديقتي س : اخت دلع لوووول .. مليقه مو

واي مي : حدج

واي مي : واذا تزوجتي بالله شلون ؟؟

صديقتي س : لا امبيه يارب الله يرزقني واحد يخليي أشيش عادي امبيه


واي مي : ولي حملتي ؟؟

صديقتي س : مادري ليش قاعده اتسكرين علي الطرق ؟

واي مي : موقاعده اسكر عليج بس لازم اتراعين مستقبلج توج صغيره

صديقتي س : اقول يلا عن الحجي الماصخ خل انروح ناخذ شيشه


واي مي : مو خوش رفيجه انتي لوووول

صديقتي س : يالنحيسه : (

شنو الهدف من الشيشه .. وشنو شعوركم لمن تشربونها ؟؟


**********

همســـــــــه
بلاكم كيف بتحمل بلاكم .. وأنا ورده وسط صحرا بلاكم

Thursday, October 16, 2008

أهميــه و وجـــود










كثيراُ ما افكر في اهميه وجود الانسان
وأهمية الرساله التي يجب أن يؤديها على وجه الارض
وأهمية إعمار الكون



الا أنني كثيراَ ما أفكر .. في أهمية وجودي على وجه الارض
لكل إنسان رساله وعمل معين وجد ليؤديه


في وسط الظلام .. ماهي هي مهمتي؟؟




قررت العمل ما يميله علي ضميري .. قررت تأنيب ضميري في حال وجد أي سوء تفاهم أو لبس في عمل ما او موضوع ما




كيف لك أيها الانسان أن تنام على وسادة من الريش وأخرى من الحرير وأنت ظالم ؟؟




كيف لك أيها الانسان أن تأكل مالذ وطاب من الخيرات وأنت تأكل مال غيرك وتنهب؟؟



هل وجد الانسان ليسرق؟
هل وجد لينهب؟







أرجع بمخليتي الصغيره ماهي مهمتي ؟



واذا بأخي الاقرع ينادي بأعلى صوته

الاقرع : واااااااااااااااي مي
الاقرع : وااااااااااااي مي

ودخل الى غرفتي بشكل سريع

واي مي : اشفييييك خرعتني
الاقرع : سلفيني



من هنا أدركت بأن لي مهمه جميله وهي تسليف القرعان
;p





***********
همســــه
قريب مني بس بعيد

Tuesday, October 14, 2008

مشـــواري مع 1+1=2





بروحي بالسياره .. الدنيا ظلمه
بروحي بالسياره .. أسمع غنيه
بروحي بالسياره .. أتحلطم
بروحي بالسياره .. ودي أصرخ





سفطت عند الاشاره .. والتفت لقيت اثنين
وأنا .. واحد


ضاق خلقي


لتفت الصوب الثاني .. هم لقيت اثنين
وأنا .. واحد





مشيت وكملت طريجي بالسياره .. وأتأمل

لقيت أثنين .. قاعدين في كوفي شوب
وأنا .. واحد


وضاق خلقي بعد

كملت طريجي

لقيت واحد ويا ثاني .. آآه يعني اثنين
وأنا .. واحد


رديت البيت .. لقيت أخوي الاقرع


أخوي : اهلا اهلا
واي مي : ليش انا واحد ؟
أخوي : شنــــو
واي مي : أنا واحد مو أثنين
أخوي : متعاطيه قبل لا تيين هاهاها
واي مي : ليش ما ترد علي ؟؟ ليش انا واحد مو اثنين ؟
أخوي : يومج أسود .. بديت اخاف منج
واي مي : انت شفهمك .. أقرع ويبي يفهم














1+1 = 2

معادله سهله .. مو ؟
ولا مومو ؟؟



ليش علي صعبه ؟



ليش انا واحد؟ فاهمين قصدي ؟؟
فسروها مثل ما تحبون .. ويشرفني كل واحد فيكم وتفسيره





*******
همســــــه

لي ناظرن ما غير شخصك يمليه

Sunday, October 12, 2008

أصـــوات




الحبيبه : أحبك
الحبيب: وانا أحبج بعد
الحبيبه : متى نكون لبعض
الحبيب : هانت حبيبتي .. بس صبري علي شوي



==



الزوجه : كل يوم تتأخر .. جنه ماعندك بيت وعيال انت مسؤول عنهم


الزوج: فكينا ولي يرحم والديج انا مو مقصر معاكم بشي

الزوجه : ياليتك تحس فييني



==



الصديقه : مو مصدقه بتزوجين؟

العروس : أحس اني بحلم


==

الطالب : هذي اخر سنه لي .. أبي أرسم مستقبلي ابي أبني حياتي

الصديق: يامعود الله يعافي البراشيم .. أمش خل انقز وانت ويا افكارك بس تبي تبني .. يبا مهما تخطط لازم اييلك طرااق يكسرك عبالك الدنيا سهالات

الطالب : لاضيق خلقي



==


حبيب وحيد : انا ليش وحيد ؟ ليش مالي حظ

الوحده ترد عليه : لان مو كل شي ايي بسهاله


==


فتاة : أحلم بفارس الاحلام .. بس وينه ؟

الفارس : تو الناس لازم تتعثرين علشان انا اوصل



==


واي مي : ليش انا اسمع كل هالاصوات

الاصوات : لان الدنيا جذي
**********
همســـه
يلي هويتك دوم
اسأل عن المحروم




Saturday, October 11, 2008

إحســاس








بعد الظلام يأتي النور يبتسم
بعد الرياح العاصفه يأتي الصفاء
بعد الغيوم السوداء تأتي الشمس المشرقه



هو ذلك الاحساس الجميل ... الذي يغمرك ويجعلك تشعر بالسعاده




هو ذلك الاحساس الجميل الذي يحتويك .. تشعر بالحب
حب كل الناس حب الدنيا حب الأهل والاصدقاء





أدري مقصره وياكم في بوستاتي نظراَ لانشغالي مع أهلي بس وعد .. في الايام اليايه برجع وبقوه لعام التدوين مع بوستاتي الغريبه


ولكم مني أجمل تحيه : )





********

همســه
السـوالف طعمهـا وياك غير .. أنا لي شفتك أحـس إني بخير


Sunday, October 5, 2008

الليــــــل




غريب هو الليل .. ليل يعم بالهدوء والسكينه .. ليل حالك السواد مظلم




أحب ليلي
أحب تلك الاشواق التي تتوهج في الليل
أحب ذلك الظلام الهادىء





ليلي يختلف عن ليلكم



ليلي كله أفكار
ليلي كله أمل
ليلي في دموع
ليلي يحتوي على لحظة صفاء مع النفس أقعد فيها مع نفسي



كل شي له طعم .. حتى الليل له طعم





******
همســــــه
أحب الليل . يذكرني بك حبيبي

Monday, September 29, 2008

تجـــربه في منتصـف الليل !!





في يوم رمضاني في الساعه الواحده والنصف بعد منتصف الليل



واذا بالوالد العزيز يريد تجربة ليت زنن في الصاله .. وبعد ما تم تركيب الليت شعرت اني في ديسكو



اختي : يبا مو حلو
الوالد : حلو

فشعرت ببعض اللقافه . ورزت الويه

واي مي : يبا في منه ألوان .. احمر واخضر واصفر

الوالد : ليش الاخت تبي تسوي حفله
واي مي : بعزم رفيجاتي الجو وايد حلو جذي




وعلى قولة اخواننا في الله المصريين .. يافرحه ما تمت


وطفت الكهرباء بسبة الليت



الوالد : يه الليت طلع سكه
اختي : ظلمه ما اشوف
واي مي : بالله هذا وقته ؟؟ ابي اشوف مسلسلات


وتعبث الوالد العزيز ورجعت الكهرباء الى بيتنا الدافىء وشعرنا بالسعاده



وتعبث الوالد مره اخرى .. وركب الليت مره اخرى

وانطفأت الكهرباء مرة اخرى




كنت حزتها في المطبخ وذهبت في الممر أمشي والدنيا ظلمه ظلمه


واذا بي ادعم بالطوفه واذا باختي اللي ودي ازنطها تضحك علي بصوت مرتفع هي و والوالد العزيز







واذا بصوت الضحك يرتفع ويرتفع .. ويرتفع ويرتفع ضحكاتهم تكاد تصيبني بالجنون






ثم رجعت الكهرباء


نظرت الى المرآة واذا بصعروره في يبهتي المسكينه ثم قلت بغضب شديد


واي مي : ترا انا انفلعت خلاص عاد انتهت الحفله ترا ماتسوي علي اعيد بصعروره


الوالد العزيز: لونها ماشي مع بدلتج
اختي : لوووووووووول




شعرت شعور غريب .. شعور انها قزرت علي في منتصف الليل و أن هذي الصعروره هي عيدية القدر





مراسلتكم

واي مي
بيتنا الدافىء
الصاله

*********

همســــه
عيدكم مبارك

Friday, September 26, 2008

زحمـه يـا دنيا زجمــه





مشالله قبل رمضان زحمه
وسط رمضان زحمه
اخر رمضان هم زحمه

عيل متى ما يصير في زحمه ؟؟





الاسوقه زحمه
الكافيهات زحمه
الصالونات اشتغل سوقهم لول هم زحمه
الجمعيات زحمه
المطاعم زحمه
الخياط زحمه

يبا مابي شي بس قصر تنورتي

الخياط : مو فاضي تعالي عقب العيد
واي مي : عشتو






في مركز سلطان .. كان جدامي وحده وريلها


الاخت : أفففففف زحمه ياربي شنو هذا
زوجها : انتي تارسه عربانتج وتقولين زحمه

طبعا الاخوان ابويهي من كثر اغراضهم مو قادره اطوف




يسوون زحمه ويتحلطمون بعد .. عيل انا شقول منحبسه في بيتنا اخاف اطلع اخاف اندعم لووول وبوم طلعت ولا زحمه




الحجي ان المناسبات ما اتيي الا الحين ملجة رفيجتي ثالت يوم العيد يعني لازم اطلع في هالزحمه وادور لي نفنوف

وأركب سيارتي .. واحط غنية زحمه يا دنيا زحمه



السؤال الفني الحين

ليش الدنيا زحمه سواء صار عيد ولا مو عيد ؟؟

*********

همســــه
قومي أوقفيلي وارفعي البوشيه

Thursday, September 25, 2008

خطــــوه




آه من خطوه تخطوها .. قد تكون في صالحك وأحيانا كثيره تكون العكس



آه من خطوه تقرر فيها مستقبلك .. وتفكر
آه من خطوه نتعثر منها





آه من خطوه تكون في انتظارنا .. ولا نراها
آه من خطوه نريدها ولا تكون قريبه منا
آه من خطوه تقودنا الى الطريق الخاطىء













وأنا هنا أرى تلك الخطوه تناديني .. تبحث عني
تسمعني .. تراقبني .. تبتسم لي


هل أنتي تلك الخطوه .. أم شبحها؟

كفي عن ملاحقتي .. دعيني







**************
همســه
كل الحكاية اشتقت لك






Sunday, September 21, 2008

فــي هــذه الأيــام








في هذي الأيام الفضيله وخصوصا في العشر الأواخر


مستحب انك تدعي هالدعاء






اللهم انك عفو كريم تحب العفو .. فاعفو عني






ولا تنسوني بالدعاء : )





******


همســـــه
اللهم انك عفو كريم تحب العفو.. فاعفو عني

Wednesday, September 17, 2008

ويـــن بنـــوصل؟





أحياناَ أحس ان احنا في مركب ماراح يرسينا
لا احنا اللي مثل قبل
ولا اهي الدنيا مثل قبل
ولا الناس اهمه مثل قبل
ولا النيه الصافيه اللي مثل قبل






يمكن انك لو تسكت اشوي واطالع .. وتفكر شلي لك وشلي عليك


صرت وايد أفكر في بوستات .. مطقوق
كلمه ورد غطاها
وتكون كلمه في الصميم



بديت احس الصمت اهو الحل .. الكل يتحلطم ما تعبتوا ؟؟



الصمت

هدوء سكون .. تعطيك لحظة تفكير وين تبي توصل وشلي تبي توصل له وتوصله



من الصعب جدا .. أن تكون الحياة
تواريخ حب .. وصوت قطار
وممشى طويلا .. وظلمة عار
وغارا تناثر بين يدي
من الصعب جدا .. أن يكون الفشل أشد انتصار




مقتبس من الشاعره أفراح الكبيسي





******

همســـــه
ربي خلقت الجمال وقلت اتقـوا
فكيف لهم أن يروا جمالي ولا يعشقـوا






Monday, September 15, 2008

دكــاتــرتنــا المحتــرمين






بالاشاره الى الموضوع اعلاه الرجاء التكرم بتقديم استقالتكم لأن ما فيكم خير و عيوني راحت فيها .. حرام اصلا يسمونكم دكاتره لعبتو بحسبتي.. اصلا كل واحد يمرض هالايام يدش على الطبيب يقول دكتور اكتب لي جذي وجذي وجذي



بتقولون لي ليش ؟؟



نفسيه ومالهم خلق ويتكلمون بالقطاره

كل واحد فيهم يتفنن ويتشيحط جدامي يقولي منو قالج ان العلاج الفلاني صحيح ؟؟

بسبة الجو عيوني صار فيها جفاف و 3 مرات اروح وارد اروح وارد ما تسوى علي .. دوام مو روحة طبيب




في زياره لي صار هذا الحوار






واي مي : دكتور شوف

وطلعت الادويه لوووووول قطره ومرهم ودوا حساسيه






الدكتور : ما عليه استعملي هذا الدوا
واي مي : اي دكتور وارد عندك اقولك الدوا ما نفع وياي تعبااااااااااااانه انا .. ليش اتجربون فيني

الدكتور : لا حول ولا قوة الا بالله يابنتي اشفيج معصبه

واي مي : تعبانه لعبتو بحسبتي ما بقى وصفه طبيه ما كتبتوها مو حساسيه دكتور جفاف عيوني جافه

الدكتور : اهدي يا بنتي

واي مي : يعني ما راح اطيب طول عمري ؟
الدكتور : منو قالج جذي .. بكتب لج تحويل احسن لج

واي مي : يكون احسن





في النهايه اكتشفت ان مو كل الدكاتره يفهمون مادري شفيهم !! يننوني معاهم





وامس رحت بليل وصار هالحوار


طبعا هالمره الدكتور هندي .. اتحاجي عربي متنح .. وتحاجي انجليزي هم متنح ..



واي مي : دكتور في دكتور قالي احط كمادات بارده على عيني

الدكتور: منو قال حط كمادات حار .. تعال قرب راس

جان اقرب راسي .. ولمحته بطرف عيني مطلع شغله جنها ابره .. جان اصرخ مااااااااابي

واي مي : لا لا مابي

دكتور: هذا احسن عشان عين مال انت

واي مي : مابي لا لا لا مابي اقولك ماااابي .. عطني دوا ومرهم وقطره


وطلعت من العياده منصدمه لول شكان بيغربل فيني هذا




*********

همســــــــه

أنا لست من خلط المزاح بجده .. فالمزاح مزاح والجد جد



Tuesday, September 9, 2008

قلمــــي





في يوم كئيب .. الجو في مشمس والشمس حارقه مع شوية رطوبه .. أشعر كأني سمكه تتجول على وجه الأرض


كنت في هذه اللحظه أتمعن النظر في قلمي على مكتبي بجانب لاب توبي وتحته دفتر مذكراتي




واذا بالقلم يرقص !!






هــــــــــه !!




يرقص هب هوب ويبتسم ابتسامه مليقه


واي مي : شنو هذا !! قلم يرقص انثبر


واذا بالقلم يغير رقصته من الهب هوب الى اللاتيني ستبس

واي مي : انا قاعده اتخيل .. مو ؟؟
القلم : لأ طبعا

واي مي : شتبي .. انثبر حولتني
القلم : مابي مابي مابي انا مزعج مثل صاحبته

واي مي : حاله كسيفه .. شنو المطلوب؟
القلم : انا القلم انا السهم الحاد .. هجرتيني

واي مي : ما هجرتك بس عفى عليك الدهر وراحت عليك
القلم : لأ شلون راحت علي وانا سلاح كل صحفي وانا ذكريات كل كاتب



وفجأه غير رقصته من اللاتيني ستبس الى شرقي


واي مي : هاهاهاهاها .. خوش رقص عليك انثبر حولتني
القلم : لأ الا لما اتقولين اسباب هرج لي


واي مي : في بدالك الكي بورد
القلم : وانا ؟؟


واي مي : مادري .. بس بدالك صار الكي بورد صار اهو السلاح الفتاك


القلم : انا انا اتروح علي



عقب وبشكل لا ارادي .. صرخت


واي مي : خلاص خلاااااااااااااااص اسكت انت حنه

خذيت القلم وقطيته من الدريشه .. وسمعت عقب صوت واحد يقول









منو هذا اللي حاذفني بالقلم ؟؟


واي مي : مو أنـــا

***********

همســـه لعشاق همستي
بعلمك كيف البشر في غيابك .. بقولك أصحابك ترا مو صحابك

قالولي عنك وانت تمدح لي فيهم .. قالولي انك ما تبيني وتبيهم

لا تخدعك ياسيدي بعض المظاهر .. غايب في عيني بس من قلبي حاضر

اهمه يبوني بس انا ما ابيهم .. انا ابيك انت واهم وشعليهم


Thursday, September 4, 2008

نـاخذ اتصــال ونقـــول ... ألــــوو





اليوم : السبت

الساعه : 6:30 المغرب

المكان : بيت أبله أمل .. بالصاله

القناة : قناة الراي
البرنامج : رايكم شباب




كانت ابله امل حاطه النفيش والبيبسي .. ومجابله القناة الراي



المذيع : يا هلا فيكم مشاهدينا .. حلقتنا اليوم بتكون مميزه وتقدرون اتشاركونا فيها وموضوعنا اليوم عن عن ليش الشي اللي انخاف منه يصير لنا .. واحنا بانتظار اتصالاتكم ومشاركاتكم



جان اتقوم ابله امل ودق على البرنامج علشان اتشاركهم في سؤال الحلقه



المذيع : ونذكر بسؤال حلقتنا اليوم ليش الشي اللي انخاف منه يصير لنا ؟؟ اي وهذا اتصال الحين وصلنا ألووو


ابله امل : ألووووو ازيــــك؟

المذيع : بخير الله يسلمج .. منو معانا ممكن اتعرفينا باسمج ؟

ابله امل : أيـــوه انا اسمي ابله امل
المذيع : حياج الله يا ابله امل .. يلا اتفضلي شاركينا في سؤال حلقتنا اليوم


ابله امل : ايوه سؤال البرنامج بتاعكو المفروض اتسموه اللي يخاف من العفريت يطلع له


المذيع : هاهاهاها اي قولي لي ليش لما انخاف من العفريت يطلع لنا؟؟


ابله امل : ايوه عشان بتخافو منه .. لو مابتخافوش ماكنش حيطلع يابني .. ولو طلع لي دانا اضربه بالجزمه يطلع لي ليه عاوز مني اييه

المذيع : اييي علشان جذي يعني ؟؟

ابله امل : ايوه امال اييييييييييه

المذيع : شاكر لج اتصالج ومشاركتج ويانا يا ابله

ابله امل : انا عاوزه اهدي

المذيع : برنامجنا مومال اهداءات بس ولا يهمج اهدي اللي تبيه

ابله امل : بحب اهدي الاغنيه اللي جايه لأمي وأبويه في الصعيد ولاختي في الكفر ولعماني وخوالي والمدرسات وبناتي الطالبات و برعي ابن عمي وحماده ابن خالتي و عبده ربه حبيب ألبي وسميه ياروح ألبي و زينب يا بعد البي وعطيات اسم الله على البي


المذيع : كل هذيله اسم الله على قلبج مشالله انشالله يوصل الاهداء لهم

ابله امل : ايوه لسا ما كملتش

المذيع : بعد ؟؟ يالله كملي

ابله امل : وبحب اهدي حنفي حارس العماره و عبده اللي بشتغل في البآآله اللي تحت العماره


المذيع : خلاص ابله بقى احد ما هدييتيه الاغنيه ؟

ابله امل : آآآآآآ في مين ياربي مين مين مين الغسال اللي بيغسل سيارتي والشغاله ميري

المذيع : خلاص يا ابله ما خلص اهدائج بديتي تخورينها ؟

ابله امل : اللـــــه شوي شوي عليا يابني .. وبحب اهدي الاغنيه دي ليك انت وللمخرج


المذيع : مشكوره يا ابله امل كلج ذوق

ابله امل : مانا عرفه ان كلي زووووووء

المذيع : ماراح نخلص اليوم ابله .. دانتي لزقه

ابله امل : يعني ايه لزقه ؟؟

المذيع : يعني دمك عسل

ابله امل : متشكره يابني .. وانت لزقه كمان .. مع السلامه
























Tuesday, September 2, 2008

يا حلوها هالابله








بناءا على طلب الجماهير لسلة ابله امل .. راح ألبي الطلب





وندش بالقصه




ابله امل في المدرسه ورن جرس المدرسه ودشوا الطالبات الصف


أمل : أبله انتي على طول دشيتي الصف سولفي ويا الابلات اشوي بل

ابله امل : بسم الله مشاء الله .. ايـــه يابنت هو انتي حتضربيني عين تسدحيني بالفراش أوولي نشالله لحسن يطؤ لي عرء ولا حاجه

أمل : جان زين هاهاها

ابله امل: هـــــــه يابنات هو انتوا صايمين ولا زي كل سنه؟؟

الطالبات : صايمين

امل: زي كل سنه

ابله امل : صحيح ؟؟ حرام عليكي جتك نيله

امل : اتغشمر وياج ابله لا صايمه .. انزين ابله يعني شنو نيله ؟

منيره : يعني ويهد هاهاها

ابله امل : ما تخرسوا وسيبونا نكمل المنهج ونخلص

امل : لا لا ابله من وين اصل كلمة نيله

منيره : من النيل

الطالبات : هاهاهاها

ابله امل : امل ومنيره ما تتهدوا بأ جتكم داهيه تاخدكوو ربنا يهدوكو

امل : من وين اصل كلمة داهيه ؟

منيره : داهيه مفرد دواهي
أمل : انزين و يهدكوا
منيره : مادري بس اللي طرا على بالي هدا

الطالبات : هاهاهاها

ابله امل : اللـــــه ما ترحموا امي بأ اخرسوا

امل : الله يرحمها

ابله امل : مين ؟؟

أمل : ابله امج

ابله امل : انا اتعصبت .. اللهم اني صائمه

منيره : ابله هدي اعصابج مانبي حصه اليوم

ابله امل : لأ مفيش حصه انهرضه نرفزتوني ربنا ياخدكو
امل : ابله

ابله امل : عاوزه اييه؟

أمل : أحبج

ابله امل : حبك برص يختي





وتنرفزت الابله وما كملوا الحصه لوووول


Monday, September 1, 2008

بديـــنا





بدينا في الانشطه الرمضانيه الا وهي مشاهدة التلفاز

حطيت قناة الراي وانا قاعده أتفطر ولا شنو هذا مسلسل كوميدي .. أم سعد .. لووووووول





تتوقعون أم سعد منو .. تقليد حق أم خماس ؟؟ ولا من بنات أفكارنا


يا هل ترى ؟؟ يا هل ترى ؟؟







ياربي احنا عطونا تقلد وبس .. مو مال ابداع ولا مخ يفكر




انزين ليش تروحون بعيد



انا عندي أفكار خلابه .. خطافه .. خطافه على وزن خلابه علشان أمشي البوست


على قولتهم يحق للشاعر مالا يحق لغيره .. وانا اقول يحق للمدون مالا يحق لغيره المهم



جنة مسلسلات هالسنه اتييب المرض كلهم ناس مادري شفيهم مينن ومعقدين وصيع


للحين انا ماكملت الفره بالرموت كنترول عشان احكم لول



بس هذي اول قزه لي التلفزيون وفي قزات يايه شورانا




المهم


ياحبنا للتقليد



********

وطلب أخير


بليز لا أشوف أحد يقلد بوستي .. التقليد الحين صاير ابيزه

Saturday, August 30, 2008

يـــــوم مليـــــق





اول شي مبارك عليكم الشهر









واي مي : يلا امشي
اختي : يالله كاني


واي مي : لاااااااااااا


طحت من الدري من أوله لي اخره .. هالطيحه تسوى عمري
hehehehehehehehe







خلوني اقول لكم بحكم اني وحده خبيره بالطيحات


لما اطيح من الدري من اوله لي الاخر

اييلك احساس انك اطير .. اتحس انك طير حر عقب
احساس حلو بس الموحلو ان جسمك كله متكسر وكدمات


والموحلو بعد لما اطيح جدام احد ما تعرفه .. عن نفسي لما اتصير فيني هالحركه ودي أبجي




يعني لي متى الواحد يطيح بالله ؟؟ بس عاد لاعت جبدي من كثر الطيحات


ادري المشكله بالكعب .. بس ما اقدر استغني عنه



...




مريت المكتبه اليوم وماكان عندي خرده ولاعت جبدي كل مكتبه امرها الفاكس عندها خربان يـــــــه شلون بالله ما اطرش فاكس





في مكتبه أكره أروح لها لووول اطريت اني اروح المهم دشيت .. وكنت حدي حدي معصبه



واي مي : السلام

الموظف : وعليكو السلام
واي مي : بدز فاكس
الموظف : آآآه اتفضلي

واي مي : عندك خرده ترا ما عندي
الموظف : معلش المره دي على حسابي
واي مي : اي شي شنو على حسابك .. عندك خرده ولا لأ
الموظف : أيوه عندي .. متعصبه كدا ليه
واي مي : ولين مو شغلك هاك دز الفاكس
الموظف : اوكي

وعقب ما طرش الفاكس

واي مي : يالله خرد لي
الموظف : ماعنديش .. خليها على حسابي

واي مي : شنووووووووو مو قلت عندك

والله والله بغيت افلعه بتلفوني .. جان اطلع وفر فر خردت عند البقاله ورديت

واي مي : تفضل
الموظف : الله بأ مش أولتلك على حسابي
واي مي : انا عرفت ليش اكره هالمكتبه




*****************
همســــه

أهواك وهمي ..كيف قلبك أهنيه
من كثر ما اسمك في .. هالقلب منحوت

Monday, August 25, 2008

أبــــي مـــاي




قف ثانيه أمام كوب الماء الذي ستشربه

فكر لثانيه واحده فقط

اذا كنت في صحراء قاحله تحت الشمس الحارقه

ماذا كنت ستختار


كوبا من الماء ؟؟ أم قرص من الخبز ؟؟




في الحقيقه أنا أعلم الاجابه مسبقاَ سوف تكون اجابتك هي كوبا من الماء



لماذا نختار كوبا من الماء ؟؟





هل فكرت في هذه الثانيه ؟؟ هل خطر هذا السؤال على بالك ؟؟


في الحقيقه الماء هو الحياة
.. انظر الى كوب الماء قبل شربه

ستلاحظ له حياة .. مع العلم بأن الماء لا يوجد له ريحه ولا لون ولا طعم


والماء هو السائل الوحيد الذي يروي الجسم حتى الشبع مع العلم بأن لا يوجد له طعم ولا نكهه




قد تشعر بالشبع او الاكتفاء من عصير البرتقال او الكوكتيل وتتوقف


و قد لا يعطيك الاحساس بالارتواء الحقيقي الذي يحتاجه جسمك


الماء هو الحياة بحد ذاته .. ماذا لو نشفت البحور والمحيطات ماذا سيحل بنا ؟؟






طبعا

يت لي كل هالاسئله لما كنت طالعه واكتشفت ان تكييف سيارتي خربان ورديت بموووووووت من العطش وقبل لا اشرب تمعنت النظر في كوب الماء .. طبعا دشيت البيت بس ادور المطبخ





واي مي : وااااااي ابي مااي ماااي

اختي : شنو من وين يايه ؟؟ من الصحراء القاحله

واي مي : التكييف خربان .. تبين اتقزين بسيارتي؟

اختي : عرضج مغري ما يطوف بس للأسف ما اقدر اقز بسياره تكييفها خربان

واي مي : هذا العرض قائم حتى اصلاح التكييف ياحلوه .. عقب ما يتحصلح اشوفج تركبين سيارتي

اختي : ام النحاسه انتي

واي مي : ادري لووووووووول





في النهايه .. الحمدالله على نعمة الماء .. والرجاء المحافظه على هالنعمه علشان لي عطشت أقدر أشرب ماي




مع تحيات ترشيد
لوووووول


Saturday, August 23, 2008

أنــا ومــرآتي





في يوم كان شديد الظلام .. والمطر الغزير يروي الارض






في يوم كنت فيه عائده من حفله كنت بها ملكه

في هذا اليوم نظرت الى مرآتي
في هذا اليوم تمعنت النظر في مرآتي
في هذا اليوم أقف أمام مرآتي أزيل الاقنعه المزيفه
في هذا اليوم أرى حمل وديع .. يحتمي من تلك الوحوش الجائعه

ذلك الحمل الوديع هو أنا



تمعنت النظر في مرآتي .. أنظر الى فتاة شعرها طويل غزير
عيناها خضراوان .. نظرت الى خاتمي الألماسي ونظرت الى فستاني

وابتسمت كنت أحرك شعري واترقب ابتسامتي
هل كنت جميله اليوم ؟؟
هل كنت الملكه اليوم ؟

اعلم بأنني كنت الملكه في هذه الليله


واذا بمرآتي تحاكيني
مرآتي : كنت فتاة المطر .. كنتي بغاية الجمال

واي مي : آآه مرأتي تحدثني

مرآتي : نعم أحدث فتاة طلبت مني التحدث اليها .. احدث فتاة تقدر الجمال


واي مي : هل انا تلك الفتاة

مرآتي : بالطبع انتي هي الفتاة .. ولكن دعيني أقول لكي من قال بأن الجمال الخارجي هو الجمال الذي يتغزل به الناس انما هو الجمال الداخلي هو الجمال الصافي النابع من القلب

واي مي : وماذا عن الجمال الخارجي ؟؟

مرآتي : جمالك الخارجي هو جمال مؤقت يذهب مع مر السنين وتبقيت انتي

واي مي : كفاكي يا مرآتي كفاكي .. دعيني استمتع بهذه الليله فأنا الملكه اليوم

مرآتي : انا احدثك حتى انبهكي لما قد تتعرضين له من غرور من نظره متعاليه من نفس لايهمها سوى الجمال


وفي هذه اللحظه .. ومع غزارة المطر ومع صوت الرعد القوي


اختلطت علي تلك الامور .. مرآتي حدثيني .. مرآتي
آآه مرآتي لا تريد التحدث معي .. كم انا حزينه وكم فكره وضعتها مرآتي في عقلي جعلتني افكر .. أشعر بالندم يا مرآتي

ذهبت مرآتي .. وذهبت في افكاري .. ويبقى الجمال الخارجي مكمل للجمال الداخلي .. واصبحت وحدي مع مرآتي أتمعن النظر في فستاني وفي خاتمي الألماسي



حدثيني يا مرآتي


*******
همســـــــه
اشعر بالخوف ...وبالرهبة
أصابعي تفارق كفي
الواني تفارق جسدي
وتعلن تمردها
يتركني كل شي
حتى أجزائي
لكن ساعة موتي
تشبث الحزن بحنجرتي
ودفن معي
بأعماق الأرض
كالمسخ في جسد عذراء