Thursday, December 31, 2009

إنـــــــت المطــــر






انت المطر
شمس وقمر

انت خيال .. لا محال


==




سألتها : شكثر صارلج اتعرفينه قبل الزواج؟
قالت لي : 7 سنين
سألتها : واكتشفتي في عقب الزواج صفات ماكنتي تعرفينها؟
قالت لي : أوووه ياكثرها



==

ليل وبرد وثلج وريح .. دنيا برا مجنونه






همســــــــــه

Dear All
Have a nice weekend and Happy New Year



Tuesday, December 29, 2009

ليــش يعنـــي .. وشمعنـــه أنا





ليش يعني وشمعنه أنا لي اليوم اللي أرد في من الدوام تقولي الوالده أنا اليوم مو طابخه غدا

ليش أنا اليوم يوعانه


ليش وشمعنه أنا اليوم يوم دشيت مكتبي ولا مـــاكو كرسي
؟؟
أدور يمين يسار ولا الاخت ماخذه الكرسي مادري منو زايرها عقب الدوام وانسحب كرسيي أنا يــــــه ليش أنا يعني


وليش السوبرفايزر كل ما يشوف ويهي يعطيني شغل فوق شغلي ويقولي

السوبرفايزر: عم عزبك معي ما ؟

ودي أقول م م م
واي مي : لا شدعوه
اي قولي مـــــــا كله لا شدعوه لا شدعوه


وليش يوم أحد يطلب مني أساعده أساعد ويوم أحتاج شغله صغيره يسوون روحهم ما سمعون
ليش ليش
!



صباحكم ورد وسكر


****
همســــــــه
وتقول أني ضلع منك
وأنت كلــــك منــــــي




Thursday, December 24, 2009

صبــاح المطــــر



تتساقط الأمطار على نافذتي .. لتقول لي كل قطره منها صباح المطر


في كل يوم تتساقط قطرات المطر أشعر بالسعاده ولكن .. لماذا لا أشعر بها الآن ؟
على الانسان أن يتكيف مع ما يريده وليش ما تفرض عليه من ظروف أو تغيير حال وما قد وصلته له والحمدالله هو ما كنت أسعى إليه لماذا الكآبه ؟


ومن هنا أنطلق لأقول
صباح الخير .. صباح المطر .. صباح الحب لكل من يحب

الله يوعدنا
;p

لما لا نحاول أن نتدار كل ما يضايقنا بطلعه حلوه .. قعده في كوفي شوب مع بعض الاصدقاء
لنعبر مرحلة الكآبه


هالحجي لي
;p
لنبدأ هذا الصباح في ابتسامه مع دعاء . مع تنمياتي لكم بيوم ممطر حلو وسعيد
هالحجي لكم
:)



***

همســــه
الله ياخوفي عليك .. الله ياخوفي
غالي وبعمري أبيك .. وأشيلك بيوفي


Tuesday, December 15, 2009

ويـــــــــاك




وياك على طول الخط .. وياك لحظه في لحظه


صبر صبر .... انت وياي؟

هـــــه

لا مو وياي .. اهو بس الزمن اللي وياي .. بعيد قريب .. بس طيفك اللي يروح ويرجع ونبقى انا والزمن

نجابل بعض .. ونضحك .. بس

لا والله انت كلش مو وياي



****

همســـــه

I Can Be your Melody

Wednesday, October 14, 2009

نسمـــــة هــــوا



دخلت نسمة الهواء من شباك غرفتي وتناثرت أوراقي في أرجاء الغرفه
وعمت الفوضى ،،، فأنا أعشق تلك النسمه



...
..
.


تذكرت سوالفنا سوا ،،، والنسمه اللي كانت ويانا

تتكلم نظراتنا ،،، والتقت أشواقنا


...
..
.
حلو هالنسمه شلون تيي وتاخذني بعيد
أطير فيها بأحلامي .. وذكرياتي .. وأحلم فيها وأنا فوق فوق إهي ساحبتني فوق




...
..
.

على شاطىء البحر حيث أجلس ،،، لتأتي تلك النسمه ،،، لتقول لي أنا هنا





...
..
.




مــــزاجــــــي


say what you need me to say

Monday, October 12, 2009

رمـــز حضــارتــك





أي شي تمارسه جدام الناس يعتبر رمز لحضارتك .. ومن حق الغير أن يحكم عليك

بس ها




مو تزعل من حكمه عليك .. أهو حكم عليك من الطريقه اللي انت تصرفت فيها
مثلا قاعد تاكل في مطعم .. أو قاعد في كوفي شوب وتسولف مع ربعك أو قاعد بالسينما وانت اطالع فلم أو قاعد بمطعم سواء كنت مع الاهل أو ربعك

طول ما انت جدام الناس تصرفاتك محسوبه عليك



فلما




تكون قاعد إتسوق السياره في أمان الله وييك واحد طاير ما وراه شي .. مو هامه شي .. طاق الدنيا بالطوفه ويسرع ولا يقحص ولا أيا كان راح ينحكم عليه ان هالشخص انسان متهور .. طائش لا يستحق أن يعطى الليسن ويعاقب لسنتين



نعم لسنتين

عدد الشباب اللي ماتوا .. وعدد الاطفال الابرياء اللي ماتوا .. عدد البنات المساكين اللي يسوقون شوي شوي .. وعدد الحريم الكبار بالعمر اللي كله ماسكين يمين إيي واحد يبتون يمارس هوايته السخيفه ويدعمهم ويودرهم ما يستاهل أن يعاقب هذا العقاب .. ألا وهو الحرمان من الليسن .. خو الشباب دم ضروسهم الليسن لاحد يقرب صوبها



ولما



إييك واحد مسرع .. طائش .. يمارس حركات مخله بأدب والذوق العام هذا شنو ؟؟

شنو عقابه ؟؟

شكله كان سكران وفاصل حده كان مسرع مابقى كاميرا ماصورته .. خارج نطاق التغطيه .. الاخ مغيم مو مستوعب

فأكتشف بأن الشارع لا تحكمه قوانين .. رمز حضارتك بقيادتك
صحيح اللي اختشوا ..ماتوا





Thursday, October 8, 2009

مقتطـــفات






هي : تشرب قهوة الصباح .. تنظر إلى البحر حيث تعكس أشعة الشمس على مياه البحر

هو : يقرأ الصحيفه ويشرب اللاتيه

فجأه يلتفت ليراها وتراه .. " للعاشقين عيون نظرتها غير الناس "






..


للصباح طعم خاص

هو ولادة يوم جديد يحمل الأمل لهذا اليوم
يمكن أن تغير أحداث يومك لتتغير حياتك

فقط

فكر كيف تعمل على تغيير مسار حياتك نحو مستقبل أفضل يحمل طموح لا حدود له








...

تتمشى في أركان الجامعة يداعب شعرها الهواء الطلق


هو : هاي مبروك على ال
Marriage
هي : هاهاهاها أي هذي رفيجتي في الفيس بوك




ليش يتكلمون كلمتين عربي وكله انجليزي ؟ ليش موكله انجليزي ؟؟

يعني أنا ال
cool







....


أحاول أن أرسُمَ خيولاً
تركضُ في براري الحريّهْ


Tuesday, September 29, 2009

السالفه ... سالفة ترتيب





في وسط زحمة التفكير
وزحمة الطلبات التي لا تنتهي
وزحمة المرور


رحت الجمعيه علشان أخلص لستة الطلبات المطلوبه مني في البيت وأنا في وسط الزحمه أشيل وأحط الاغراض بالجمعيه وأشيل الكاكاو وأحط الصابون أخذ الشاي وغيره من الاغراض وعلى ما أقرا اللسته وأفكر أي صوب أروح علشان أوصل للغرض اللي أبي أوصل له


فجأه لمحت عربانه وسط الجمعيه لاهي يمين ولا هي يسار وصاحبها متربع يطالع الرف ويفكر .. سرحان عبدالبصير أبي أطوف يعني شلون لازم أبتون هني بعد
!!

وأنا في لحظة التبتون لمحت عيني عربانة ذلك الشاب إنها مرتبه مرتبه ترتيب مرتب الاغراض مرتبها بطريقة وايه حلوه .. طالعت عربانتي ولا أبو وأهل وأجداد العفسه والحوسه

إنقص ويهي جان أهد اللسته وأقعد أرتب أغراضي اللي بالعربانه ومشيت .. شوي ولهيت في اللسته والاغراض ولا الاخ بويهي مرة ثانيه عربانته صافطه وسط الجمعيه وأبتون من يد ويديد ولمحت اهو شلون مرتب أغراضه .. وأهد اللسته اللي بيدي وأقعد أرتب أغراضي


شي وايد حلو ترتيبه لأغراضه بس المو حلو ان الاخ كله يوقفها وسط الجمعيه مادري شسالفته !



أول مره أشوف بعيني ريال يرتب أغراضه .. شي وايد حلو

!!

Sunday, September 27, 2009

أتحلطم يــا زمــاني



إيييييــه خلني أتحلطم يا زماني
محد يبي يسمع الصج
وكل من يقص على الثاني
يا إنك مقصه يالي في بالي
خلني أتحلطم يا زماني




أتوقع فيني مواهب مدفونه
;pp


Thursday, July 9, 2009

Business cake








الموقع : المطبخ
الساعه : 3:30 عصراَ
أعضاء المطبخ : انا والوالده الله يخليها وخدامتنا المصونه .. بالمختصر المعزبه
الخطه : عمل كيك
الوضع : خدامتنا تتحلطم




خدامتنا : واي مي لازم انت يعرف يسوي كيك
واي مي : ومنو قالج اني ما اعرف اسوي كيك
خدامتنا : يور كيك نو قوود
واي مي : انا الحين بسوي كيك وانتي ماراح تاكلين منه
خدامتنا : انا يقول حق ماما
الوالده : لا اتحرشين فيها .. الحين تفصل علينا
خدامتنا : ماي كيك از قوود
واي مي : عشتو

خدامتنا : مدام انا يسوي كيك
واي مي : سوكارو أي هاف بزنس فور يو
خدامتنا : وت؟

جلست بترقب وبققت عيونها

واي مي : افتر 4 ييرز يو ول قو تو سريلانكا ميك كيك بزنس اند يو ول هاف ألوت اوف موني

خدامتنا : وااو ثانكيو واي مي ثانكيو
واي مي : بعدين انتي سوي جيك سند موني فور مي .. اوكيك
خدامتنا : وووووووووووت .. نووووووووووووووو


عيونها طلعت برا .. وحسيت اني راح انفلع بالقلاص .. بلعت ريجي وقلت

واي مي : خلاص أي دونت ونت يور موني .. وماراح تاكلين من كيكتي
;
pp





خدامتنا : أي لووف كيك .. أي ونت تو إييت يووووووور كيك




Thursday, July 2, 2009

إصنــع الحـــل





تمر بك الأيام وترى الدنيا بعين واحده .. و نظره واحده وحكم واحد
حتى يأتي ذلك الشخص ليبدل تلك النظرة الى ما هو أبعد من ما تراه العين
وأبعد من ما قد يفكر به العقل

تتبدل الألوان المظلمه الى الألوان الفاتحه .. لترى الدنيا بنظره مختلفه وتفكر في ما كنت تفعله بنفسك





قف



واجه نفسك
إصنع الحل
وابتسم



هكذا تمشي الحياة .. وهكذا يجب أن نكون







RS

شكرا لك .. كلمة شكرا شويه في حقك





****
همســـــــــه

أحاول أن أرسُمَ بحراً... قزحيَّ الألوانْ

Monday, June 22, 2009

هــل أعود ... ؟







هي زحمة أفكار .. و زحمة مواعيد .. وزحمة ظروف

وايد صرت أفكر .. أرد للتدوين ؟ ليش ؟؟
ولهت على مدونتي .. الصغيره
ولهت عليكم











أشكر كل من سأل عني عبر الايميل .. فيكم الخير والله .. وأشكر كل من سأل عني عبر مدونتي الصغيره

وأحب اشكر كل البلوقرز .. يا حلوكم والله ما توقعت تولهون علي :)

اعترفوا شولهتوا عليه ؟

;p



و أشكر
Anonymous

اللي سألوا عني :)

Wednesday, May 6, 2009

اهتمـامـات سطحيـــه





السطحيه في التفكير .. السطحيه في الحكم على الاخرين .. السطحيه في النقاش والاهتمامات

زادت ماكانت جذي .. اهتمامات جدا سخيفه ... الا من رحم ربي


لما يكون ريال عمره 26 وفوق .. همه بس المغازل وملاحق البنات .. هذي سطحيه
الحين انت بدال ما تقعد قعد لك بمكان تقرا كتاب .. تركض بهالمجمعات ولا هايت بهالشوارع






لما تكون بنت اهتماماته فقط مجمعات وأسوقه وكوفي شوبات .. يعني كله برا البيت ماكو شي مفيد اتسويه
انزين ليش عندح وقت فراغ اطوله قسميه الطلعات حلوه .. بس هم ان يكون عندج اهتمامات أحلى




موقف


عرفت وحده قبل كانت تقولي .. قبل لا اروح شارع الحب لازم أبلغ أخوي لأن قال لها لي بيتي تروحين قوليلي علشان لا أروح وألقاج هناك

يوم انتي ويوم أنا



يعني يوم اهي تروح ويوم اخوها يروح

؟؟


تعليقي
خوش خوش خوش .. خوش اهتمام .. خوش طلعه











أنا ملاحظه حتى الجيل هذا اللي أعمارهم 15 سنه من البنات والشباب .. اهتماماتهم غيرنا واحنا قبل
الدنيا غير الدنيا
والسوالف غير السوالف
والاهتمامات غير الاهتمامات




هالجيل ماله أي اهتمام


الحوار معاهم جدا صعب .. ولو تكلمت وياهم بتطلع انت متخلف ورجعي
شكو التخلف بالاهتمامات؟؟



اوكي مو بس هالجيل .. في وايد من جيلنا اهتماماته ضعيفه .. اهي اهتمامات فقط التشيحط الزايد بلا هدف



أخوي الصغير بالروضه

من الحين طلعت له اهتمامات وهوايات ما يستغني عنها حتى بالطلعه كامرته وياه يصور .. خل يعرف قيمة كل شي حلو يشوفه خل يفهم ويعرف ان الانسان من غير هوايه يضيع ينتهي .. والرسم تعبير عن اللي داخله .. خل يكبر اشوي وامسكه كتب
لازم يكبر ومايكون سخيف مثل اللي قاعده اشوفهم


الله يستر

Sunday, May 3, 2009

من القلـب إلــى القلــب - 3







Krimi




يا حلو إيميلات صباح الخير ويا حلو الأدعيه الصباحيه


صباحك ورد











عطاء


اللي يفكر يعطي .. لا يفكر ان ممكن ياخذ من اللي عطاه
أو بالاحرى لا تنطر من اللي عطيته ان يعطيك .. اللي بيعطي يعطي من غير حدود ولا ينتظر مردود .. هذا هو العطاء




















اهي اللحظه




اهي اللحظه اللي فيها تمر عليك نسمة هوا حلوه إتذكرك بناس .. بناس غير .. جوهم غير .. كلامهم غير


تصير وياكم؟










Monday, April 27, 2009

الــواحد مـا يعرف ينــام .. يعني ؟؟






معدله نومتي واحترمت خطتي .. ومشيت على مبادئها ولا ؟؟

صوت تقحص .. أيقظني من النوم

تقحص السايير .. الساعه 2:30 منو هذا الفاضي اللي طايحله تقحص في هالحزه .. ما يروح يخمد ابيتهم

ولا يروح يسويله أي شي غير هالتقحص .. لأ صج صج صج .. أبي هوات التقحص شيحسون في لما السياره تفتر فيهم والدنيا اتصير فوق تحت .. أبي أفهم وين المتعه؟؟

أنا أخاف من 3

صوت التقحص
وصوت الرعد
وصوت السياكل



مادري شلون لي تزوجت وسكنت بروحي وريلي مو موجود مثلا .. شنو بتكون ردة فعلي؟
لووول


***
لأ جد موضوع سخيف وما ينسكت عنه .. شي يبط الجبد .. أنا معصبه .. نومتي طارت

Sunday, April 19, 2009

مشــاعر لا تستحــقها







من أنت لتظن بأنك قد تمتلك قلبي؟
من أنت لتفكر بأن تمتلك كياني؟



فالتعلم يا هذا ... لست من ممتلكاتك لكي تمتلكها

لتخرجها وتتظاهر بها .. لتعلمعها و تتبهرج بها

لست من تلك الممتلكات التي تفكر بها



أنت لا تستحق قلب يحتوي على تلك المشاعر الدافئه .. أنت لا تستحق الدفىء



أنا زهره تحيط بها الأشواك









*****

همســــــــــه
طبعــي أنــا غيـــر البشــــر

Monday, April 13, 2009

يا ليل العاشقين .. أهل الغرام مساكين





تتمشى أبله أمل بدلع ورقه.. وأمل تخزها وتقول


أمل : ترا مولايق كلش
أبله أمل : انتي متغازه مني

أمل : يامعوده
أبله أمل: انا عاوزه رقم حمد
أمل : ما اعرفه

أبله أمل : يابكاشه انتي بتعرفي الرقم اديني ياه .. دا ابن خالتك اكيد عندك رقمه عاوزاه في شغل
أمل : سو سووري

أبله أمل : يام حمد .. أنا عندي شغل مع حمد ممكن تديني رقمه

أم حمد : أي حاضر حبيبتي

أمل : خالتي لأأأأأ
أبله أمل : ياسلام .. الليليه دي بأ مش حتفوت من ايدي







في تمام الساعه
1:00 AM


إطرش أبله أمل مسج لحمد

المسج

يارب تموت

يارب

أدعي من كل قلبي

انك تموت

فيني مثل ما أموت فيك

حمد كان مع ربعه و وصلت له المسج

حمد : شنو هذا ؟

رد عليها بمسج


المسج

شنو هالحب الانتحاري ؟
منو معاي؟





ردت أبله أمل عليه

المسج

:*





حمد : أي شي
رفيج حمد : شفيك ؟؟

وبسرعه خطف التلفون من حمد .. وشاف اللي شافه .. وبسرعه رد عليها من تلفون حمد

المسج
:
)



أبله أمل ردت عليه
المسج

يا حلو انت يا جميل .. يا مكلبز يا عسل


رفيج حمد : شنو هذا ؟؟ انت قاعد اتحاجي منو بالضبط ؟ شنو هالغزل ؟؟ قاعد اتغازل صعيدي؟



وبسرعه دقت ابله امل .. ورد رفيج حمد .. لان الفضول ذابحه

أبله أمل : بحبببببببببببببببببببك
رفيج حمد : شنو هذا .. النمره غلط يبا
أبله أمل : بص يا حمد .. ما تستعبطش عليا .. بحبببك ما تفهم بأ
رفيج حمد : بعد اتعرفين حمد .. منو انتي ؟
أبله أمل : انت اللي مين؟
رفيج حمد : مو شغلج انتي منو؟
أبله أمل : أنا أبله أمل مدرسة كيميا .. وبدي دروس خصوصيه وبقدس الحياة الزوجيه

رفيج حمد : اختي يمكن انتي تبين ادقين على الحج برعي ولا المعلم بسيوني .. ترا انتي غلطانه بالرقم

أبله أمل : دا ايه اليوم المنيل ده
رفيج حمد : ليش يبا .. يومج عسل يا عسل
أبله أمل : إديني حمد
رفيج حمد : آسف حمد مشغول .. وجدوله مزحوم .. خلج معاي شنو مشكلتج معاه؟
أبله أمل : ماعنديش مشكله .. عاوزه أكلم حمد
رفيج حمد : ترا حمد متخرج من الثانويه صار له دهر .. مو محتاج دروس خصوصيه
أبله أمل : مش شغلك انت الله .. عاوز ايه انت ما تديني حمد
رفيج حمد : بس انا حبيتج
أبله أمل : حبك برص . و عشره خرس
رفيج حمد : لأ لأ .. ليش مو تسعه ليش عشره .. ألحق على منو ولا منو بعدين .. القلب وما يهوى .. يا متختخ يا جميل
أبله أمل : دا ايه الليله السوده
رفيج حمد : الليله اليوم حدها ورديه رومانسيه يا حلوج .. عفيه بشوف صورتج
أبله أمل : يخرب بيتك وبيت بيتك وبيت جيرانك .. اديني حمد
رفيج حمد : حمد .. ترا لوعت جبدي هالصعيديه تبي اتحاجيك
أبله أمل : صعيديه بعينك انا من القاهره
رفيج حمد : بس عاد خلاص لاعت جبدي
أبله أمل : اسم الله على شبدك يا بعد شبدي
رفيج حمد : يعل شبدج البط
أبله أمل : ليه كدا بس .. ما كونا كويسين






وتوووووووووووووت .. خلص رصيد أبله أمل
;p

Monday, April 6, 2009

لم ولن تستسلم .. أبله أمل









المكان: بيت أمل

الشخصيات : أم أمل .. وأمل .. وأبله أمل .. حمد .. وأم حمد


صار زحمة أملات هني لوول



في تمام الساعه 6:00 الغرب .. وفي بيت أمل تحديداَ



أم أمل : أمل انا عازمه اختي وحمد .. دقي على ابلتج اهي تحب هاليمعات

أمل : ها ابله امل مشغوله اليوم

أم أمل : منو قالج ؟ أي قالت جذي غريبه



رن تلفون البيت

أم أمل : ألوو

أبله أمل : إزيك يام امل

أم أمل : ياهلا ومرحبا .. توني كنت أسأل أمل عنج . قالت لي انج مشغوله

أبله أمل : ليه هو في ايه؟

أم أمل : أبد والله عازمه اختي وحمد .. وقلت انتي تحبين يمعتنا حياج حبيبتي

أبله أمل : يالهوي حمد موجود .. انا جاااايه طيراان .. مسافة السكه




وبعد نص ساعه من الوقت .. انطق باب البيت .. كانت ابله امل اول الموجودين


أمل : يا هلا ومرحبا

أبله أمل : ايوه ايوه ياختي .. بتئولي لأمك اني مشغوله هاا .. عاوزه توزعيني بس ايه انا آعده على البك .. هو حمد فين؟؟

أمل : بل بل بل بل كليتيني .. حتى ما سألتي عن امي يايه تسئلين عن حمد

أم أمل : يا هلا ياهلا بأبله امل .. شونج حبيبتي شخبارج

أبله أمل : انا كويسه يا البي .. ايه رأيك في تسريحة شعري

أم أمل : يه يه يه شنو هالكشخه ... كاشخه اليوم شعندج

أمل : أي أي حدها كاشخه اليوم .. شعندج اليوووووم هاااااا

أبله أمل : انا اتكسفت منكو انا متزيئه لحمد أأقصد لام حمد أأصد .. عشان كان عندي حفله وكنسلتها وجيتكو

أمل : عندج حفله ها .. علينا ؟؟

أبله أمل : اووص

أم أمل : اشفيكم ؟

أمل : ولا شي





وصلوا حمد وأم حمد



أم أمل : يا هلا ورمحبا شونكم شخباركم

أم حمد : بخير عساج بخير
حمد : شونج خالتي .. شخبارج

أم أمل : بخير الله يسلمك .. تفضلوا حياكم

حمد : يه يه يه ابله امل عندنا شونج ابله شخبارج .. امل شووونج

أمل : انا بخير

أبله أمل : دا انا كويسه خالص خالص خالص

حمد : عسى دوم يبا






تحمر وجنتا أبله أمل .. وتتدلع وتلعب بشعرها

أمل تخز ابلتها وحدها معصبه




أبله أمل : دا ايه الحلاوه دي .. عئبال مانشوفك عريس ياحمد

حمد : مشكوره ونفرح فيج يا ابله

أمل : لا تستانسين ترا اكيد مو انتي اللي بتكونين العروس

أبله أمل : ولا انتي ياختي

حمد : اشفيكم ؟

أبله أمل : دا تيه الامر دا .. ايه رأيك حمد نتمشى في الحوش؟

حمد : لا هني أحسن برا حرر

أمل : أحسن اندقري

أبله أمل : طيب ايه رأيك أعملك أهوه مزبوطه
حمد : لا شكرا ما احب القهوه والله .. وبعدين انتي ضيفه الله يهداج

أمل : عسى دوم هالتدقر

حمد : شنو
أمل : لا ولا شي



رن تلفون حمد .. وحمد أخذ التلفون وطلع برا يتكلم .. وبدت أمل اتزلق وايرات


أبله أمل : هو طلع ليه ليه ما يتكلمش أدامنا
أمل : حبيبتي قاعد يكلم وحده

أبله أمل : انتي بتضحكي علينا علشان تاخديه مني مش كدا

أمل : كيفج



رجع حمد .. فرحان ويبتسم


أبله أمل : هو انت كنت بتكلم مين؟
حمد: واحد من الربع

أبله أمل : أمااااااااااااال بتضحك عليه
حمد : يه لازم أبجي يعني؟

أمل : أنا عازمتك باجر .. على الغذا مو تنسى
حمد : ايه انشالله ماراح انسى

أبله أمل : ايه في مواعيد من ورايا؟

حمد : لا شدعوه حياج ويانا
أمل : انا حاجزه حق شخصين ما اقدر اغير الحجز

حمد : انزين ما عليه انا استأذن بروح الشاليه ويا ربعي ما عليه أمل باجر على موعدنا اوكي يالله باي

أبله أمل : استنااا عاوزه اروح معاك
حمد: وين الشاليه؟

أبله امل : ايوه عاوزه استانس معاك
حمد : ما يصير يا يبا شنو تستانسين هناك ربعي
أبله أمل : ايوه نعد مه ربعك مافيهاش حاجه
حمد: ولين لا لا شسالفه ما يصير
ابله امل : كل حاجه بتصير .. معايه وبعدين حنغني في الطريىء ونتونس
حمد : لااااااا شنو ما يصير يايبا ما يصير
ابله امل : لسا كل شويه بتئولي مايصير .. حاجي يعني حاااااااجي
حمد : شنو هاللزقه؟

ابله امل : يعني ايه لزقه؟
حمد : يعني عسل ياعسل
ابله امل : دا انت اللزقه يابعد عمري
حمد : يلا عاد عطيناج ويه .. خلاص قعدي هني ويا الحريم
ابله امل : لأ انا عاوزاك انت
حمد : ترا انتي صج لزقه



وراح حمد الشاليه تاركا ابله امل .. تفكر بكلمة لزقه على اساس انها عسل

أمل : اشفيج تبتسمين




ترد بدلع شديد وهي تلعب بشعرها




أبله أمل : كان بيتغزل فيا ويئولي انتي لزقه






انتهى



Wednesday, April 1, 2009

فـي شـــي إنكســر






اللي إنكسر ما يتصلح .. هذا اللي اعرفه
واللي اعرفه ان حتى لو تصلح .. مستحيل يرد مثل قبل


هي : ما تراعي مشاعري .. أنا مو محتاجتك
هو : ماشي





بعد فتره من الزمن



هي : ما كان قصدي .. سامحني
هو :خلج عند كلمتج قولي اني مو محتاجتك




هل لازم إهي إتذل نفسها عشان اهو يرضى عليها ؟


من المؤكد إن العلاقات بين الناس مبينيه على الثقه والتفاهم .. بس لو يت كلمه وجرحت الطرف الثاني مستحيل الطرف الثاني أن يقبلها .. وحتى لو قبلها .. مستحيل يرد كل مثل قبل

شلون كلمه تكسر علاقه بين الطرفين؟
وليش لو اترد العلاقه .. مايرد مثل قبل؟


لان في شي انكسر.. مستحيل اللي ينكسر يتصلح وحتى لو تصلح ما يرد مثل قبل مستحيل





قد تصل العلاقه بين الطرفين الى حد الانفجار .. ولكنها ساكنه لا تتحرك لكي تؤدي الى الانفجار فيكون الكسر هو الحل




هي : أنا فعلا مو محتاجتك

عندما يصل الطرف الاول الى قرار انه لا يحتاج الطرف الثاني .. فهدا القرار ينبع من برود مسبق في تلك العلاقه الغامضه


ومن هنا نرى بأن الكسر .. ممكن أن يكون نهاية علاقه .. وبداية حياة جديده








*********
همســــه

لم أعُدْ قادرةً على الحُبِّ... ولا على الكراهيَهْ
ولا على الصَمْتِ, ولا على الصُرَاخْ
ولا على النِسْيان, ولا على التَذَكُّر
ْ
لم أعُدْ قادرةً على مُمَارسة أُنوثتي
فأشواقي ذهبتْ في إجازةٍ طويلَهْ


Sunday, March 29, 2009

كنتــــي أميـــره







كانت ليله تحكيها الجداول للوديان
تلك ليله كانت أسطوره

من أساطير وليالي ألف ليله وليله





دخلت القاعه وهي تنثر الورود .. وبابتسامتها كانت أميره
وبفستانها كانت ملكه .. وبضحكتها كانت ساحره

كانت ليله من أجمل الليالي .. ليلة زفافها

في تلك اللحظات خالجني شعور بالسعاده .. الشعور بالفرح والامل








كل اللي أقدر أقوله .. مبروك عروستنا




الفال لي ولكم يا بنات
:)

Friday, March 20, 2009

من القلب الى القلب - 2







ZOOZ

قلبي معاج ومع الوالده

ولهت عليج لما ادشين عندي بالكومنت اتسوين جو .. حتى لو كنت معصبه كنت أضحك من الكومنت اللي تكتبينه لي

الله يردج بالسلامه انتي والوالده

Missing You






**



أصدقاء


كثر ما إتعرف على أصدقاء في هالدنيا .. ما يطلع الا بس واحد منهم بس اللي يفهمك







**


أبيات عجبتني

عرف الحبيـب مكانـه فتدلـلا
وقنعـت منـه بموعـد فتعلـلا
..
ولقد خشيت بأن يكـون امالـه
غيري وطبع الغصن ان يتميـلا
..
واظنه طلـب الجديـد وطالمـا
عتق القميص على امرىءٍ فتبدلا
..
وعلقته كا لغصن اسمـر اهيفـاً
وعشقته كالظبي احـور اكحـلا





**

عتــــوي


قبل جم يوم كانوا الاهل متفقين إنهم يتيمعون في بيت خالي
يومها راحت علي نومه .. واهلي راحوا وانا مادري عنهم .. قعدت من النوم الدنيا صخه ماكو احد خالي داق علي يزفني لاني مارحت

بدلت ملابسي بسرعه ورحت عند خالي تقريبا كانت الساعه 7:30 المغرب .. صفيت سيارتي وانا
ماشيه والدنيا ظلمه


أمشي الدنيا صخه ولا فجأه

أسمع



ميــــــــو


إلتفت ولا عتوي .. عتوي عتوي عتوي .. خزني هذيج الخزه اللي خلت قلبي يوقف

ركضت أشوه اني كنت لابسه فلات مو كعب .. أي أي ركضت ولحقني العتوي لحقني

ركضت وركضت .. ولا
واحد بالفريج قاعد يطمش شفيها هذي تركض ؟؟


ركضت وصلت بيت خالي بطلت الباب بسرعه دشيت وصكيته .. ولا أسمع صوت


دب



العتوي دعم بالباب

!!


يتني البجيه .. شيبي هالعتوي لاحقني .. ما سويت شي

!!

وصلت عندهم وقلت لهم السالفه .. ولا ما اشوف الا الكل منسدح من الضحك
شسالفه ؟ ماكو شي يضحك ..
لو انا طايحه بيد هالعتوي جان نتفني

Monday, March 16, 2009

أبله أمل و الأزمه الاقتصاديه








حابه أذكركم في العوامل الرئيسيه في قصتي .. الاحداث تدور بين بنت اسمها أمل .. والمدرسه أبله أمل

أبله أمل .. هي مدرسة لمادة الكيميا في مدرسه خاصه


ونبتدي أحداث قصتنا




اجتمع المدرسات و الناظره مع إدارة المدرسه صباحا في تمام الساعه الثامنه

الإداره : يا مدرسات لازم نتأقلم مع الاحوال والاوضاع الاقتصاديه اللي صايره
أبله أمل : يعني إيه يختي ؟

الإداره : يعني يا ابله لابد من تقليل من رواتبكم
أبله أمل : ايه ايه ايه ايه ايه ؟؟

الإداره : اذا ما قللنا لازم نستغني عن جزء من الموضفين .. احنا مانبي نخسر كفاءه متميزه فلابد من التأقلم
بالاضافه الى ان جزء من أولياء الامور اللي قاعدين يستغنون عن شغلهم وفي منهم اللي يطلع واللي يسافر هذا كله بسبة الازمه الاقتصاديه .. وطبعا علشان يقللون مصاريفهم قاعدين يسحبون قيد أبنائهم وهني راح اتكون مشكلتنا راح اتقل مصاريفنا والاقبال علينا

الناظره : معاج حق لابد من التأقلم

أبله أمل : تأقلم ايه ياختي ؟؟ المعاش وحيبآلي نصه أعمل ايه انا بأ اخر الشهر أشحت يعني


الإداره : كلنا راح تتقلل معاشاتنا مو بس انتي يا ابله
الناظره : كلنا راح نتأقلم مع هذا الوضع احنا مطرين .. وأتمنى المساعده هني من المدرسات الاجتماع انتهى .. اتمنى من كل مدرسه الحين تروح حصتها لو سمحتوا مانبي حصص البنات اتضيع اليوم



كانت ابله امل .. تمشي بروحها غارقه بالتفكير والمصاريف اللي مولاقيه لها حل .. ودخلت الصف ابله امل


ابله امل : السلام عليكو يا بنات
الطالبات : وعليكم السلام

ابله امل : مافيش حصه النهرضه
أمل : ابله ليش؟

ابله امل : مليش نفس أشرح
أمل : أبله ضميرج راح يأنبج

ابله امل : ضمير ايه يابنتي .. في فلوس في ضمير ما فيش ما فيش ضمير

أمل : ليش ابله ماراح يعطونكم معاش؟

ابله امل : لأ يا ختي .. حيلهفو نصه علشان الاوضاع المتنيله

أمل : ابله قزريها دروس خصوصيه

ابله امل : آآه والله فكره يابت .. جبتيها
أمل : ابله انا صاحبة الفكره النص بالنص

الطالبات : ها ها ها ها
ابله امل :نعم ياختي انا أتعب في الشرح وانتي تاخديها كدا
أمل : عيل شون عيل

ابله امل : لأ يا حببتي .. انتي تعملي شاي وأهوه
أمل : ليش ابله انا خدامه؟
الطالبات : ها ها ها ها ها

ابله أمل : اااة يا حببتي .. عايزه تاخدي فلوس كدا .. ما فيش يا حببتي
أمل : بس هونت يبا مابي .. يالله بتخلص الحصه نبي ندرس ونفتك من هالماده

ابله امل : ايه اللي حاصل النهرضه .. امل عاوزه تدرس .. يا ختي اتنيلي


وفجأه رن تلفون أبله أمل .. ترن ترن

امل : ابله شنو نغمة الصعايده هذي فضحتينا

ابله امل : اخرسي يا بنت دا ترااااااس
امل : يا معوده انتي وراثج


أبله امل : الوو
المتصل : مرحبا اختي .. معاج سالم من شركة كاب كويت

ابله امل : بتاعت ايه الشركة دي ؟
المتصل : احنا شركة تداول للأوراق الماليه

ابله امل : ايوه عاوز ايه يعني
المتصل : اسمج طلع معانا .. واحنا حابين نهديج كورسات مجانيه في ادارة فلوسج في البورصه والتداول وغيره

ابله امل : نعم يا بني ؟ فلوس ايه ؟ كوسات ايه ؟ عاوز انت اديك دروس في الكيميا ؟؟
المتصل : نعم؟

ابله امل : جتكو نيله مانتوا اساس المصايب دي .. وبعدين مش عاوزه كورسات ولا حاجه ما عنديش فلوس اصلا عشان اديرهم


المتصل : مدرسة كيميا وماعندج فلوس ؟؟ انتي اغنى مني حدج مقزرتها دروس خصوصيه

ابله امل : في ايه اهو انت عاوز تضربني عين تسدحني في الفراش .. يا شيخ إتلهي مش حضيع شقا عمري كله في بورصه ما عرفش ايه


المتصل : طيعيني باجر اتصيرين غنيه وما تحتاجين دروس خصوصيه
ابله امل : اللــــــــــــــه اهو انت حتلزء لي .. مألونالك مش عاوزه


وسكرت التلفون في وجه المتصل

أمل : ابله شيبي منج
ابله امل : انتي خليكي في الدرس أووومي إمسحي الصبوره

امل : لا ابله خلج اقتصاديه اشرحي شفهي .. مو الا صبوره الطباشير يحتاج فلوس والفلوس هذي ياخذونها من معاشاتكم علشان يشترون طباشير عقب انتي ادرسينا في

ابله امل : ما تمسحيج الصبوره .. وما فيش درس النهرضه .. دا ايه اليوم المنيل ده ؟؟







وللحديث بقيه





Saturday, March 14, 2009

أبله أمل .. عادت إليكم من جديد



تلبيه لرغبة الجماهير
أبله أمل بترد لكم
وهذي لنكات حق اللي ما يعرف شسالفة أبله أمل :)
Soon
مع أبله أمل
:)

Saturday, March 7, 2009

للألم متــعه








هل تشعر بالألم ؟

نعم الألم







أنا أشعر به .. في الحقيقه لايوجد سبب معين .. لكن هي المتعه

متعة الشعور بالألم .. أن تتألم في أعماق قلبك .. وتبحر في عالم الذكريات .. وتتنهد .. بعدها تبدأ بالبحث عن أغنيه حزينه تهيج تلك المشاعر .. لتدمع عينيك .. ربما تصرخ .. بعدها تبدأ بتحطيم كل ماهو حولك
وتنظر الى نفسك الى المرآة .. وتتألم



تكون المتعه هنا في غسل كل ما هو مترسب في قلبك .. لتصفي ذلك الغبار .. وتزرع بدلا منها الأشجار






******

همســـــــه


ذاكرتي مليئه بعشرات الثقوب
فلا الشوارع لها ذات الأسماء
ولا العناوين لها ذلك الحنين

Friday, February 27, 2009

إذا




أبطل تلفوني ولا مسج من صديقتي ورفيقة دربي .. جنها حاسه فيني




المسج

إذا أتعبتك آلام الدنيا فلا تحزن

فربما اشتاق الله لسماع صوتك وأنت تدعوه

سبحان الله وبحمده .. سبحان الله العظيم




*****
همســــــــــــه

سبحان الله وبحمده .. سبحان الله العظيم

Tuesday, February 24, 2009

ألــس فــي بلاد العجــائــب




تذهب ألس الى احدى المجمعات .. وتتجه نحو كوفي شوب ( كوستا )

لتجد صديقاتها مجتمعين ينتظرونها بشغف .. تذهب لهم وهي مبتسمه لتسلم عليهم وتسألهم عن أخبارهم وأحوالهم

وتطلب قهوتها المفضله المضاف اليها الكريمه والكراميل .. لتشربها وتسافر في لحظه الى عالم من الكاراميل لذيذ الطعم


وتقاطعها صديقتها منيره : تزوجتي ؟ من زمان عنج

تجيب عليها ألس : لا لي الحين ما يأ النصيب
منيره : كل هالجمال ما تزوجتي لي الحين؟

ألس : عاد النصيب اهو اللي يحكم .. انتي خلج بكيكتج اكليها كلها

منيره : أي والله ريلي يبيني أضعف .. بس ماني قادره اقاوم الكيك

فاطمه : انتي مسكي عمرج عن الكيك لا ريلج يتزوج عليج

منيره : أي والله الله يستر وايد ينقز علي .. ابيج تلبسين جذي وجذي


فاطمه : لا ديري بالج هالايام البنات بس يخطفون قلوب الرياييل مو الرياييل الحين قلوبهم رهيفه يعني عادي توقعي ألس تخطف ريلج

منيره : هاوووو .. تسويها عاد

ألس : ها ها ها ها لا حبيبتي انا مابي مستعمل

فاطمه : لا صج والله عشنا وشفنا بنات يدلعون ويتأمرون انتي لي انخطبتي حمدي ربج
ألس : لا انا لي الحين في انتظار فارس أحلامي

فاطمه : مالت عليج و على فارس أحلامج .. كل ما تقدم لج واحد قلتي هذا في وفي وترفضين أي ليش عاد

تقاطعهم منيره : أي خل نتلفت انشوف فارس أحلامها .. شوفي هذاك اللي مبقق عيونه باللاب توب هذا شرايج في ؟

ألس : لا يبا شفيكم اليوم ماكو غيري .. وبعدين طالعي بيدش بالشاشه من كثر ما اهو مركز

فاطمه : أي ماكو غيرج اللي لي الحين ما تزوجت .. فشورانا خل انتحرش فيج

ألس : هاهاها .. بس عاد يوزوعني

فاطمه : شرايج بهذاك

منيره بلقافه تسأل

منيره : وينه وينه ؟

فاطمه : انتي متزوجه اووص ولا كلمه .. شربي شربي قهوتج وفكينا


ألس : شفيه ؟

فاطمه : شوفي يقرا جريده تكانه ما يتلفت .. بس جنه مبوز


منيره : شكله متهاش ويا الربع

ألس : وااااي انتوا شكو بالناس



ويضحكون بصوت عالي .. لتصل ضحكتها إليه

يراها .. يتأمل أصابعها .. يخاطب نظراتها
هي

تشرب قهوتها .. تضحك مع صديقاتها .. مستمتعه بطعم الكاراميل .. غير مباليه بأي نظره


هو

يحاول ارسال لها تلك النظرات .. نظرات الاعجاب والانبهار


هي

شعرت بنظره .. خافته عابره من مجهول .. واستمرت تلك الضحكات ممزوجه بالكاراميل غير مباليه





على الهامش

" قالت لي صديقه أن صديقتها انخطبت من كوفي شوب وتزوجت "
شباب تسوونها ؟
بنات تتقبلونها ؟




******

همســــــــــــــــه

يا سيِّدي يا الذي دوماً يعيدُ ترتيبَ أيَّامي
وتشكيلَ أنوثتي...أريد أن أتكئ على حنان كَلِماتِكْ
حتى لا أبقى في العَرَاءْ وأريدُ أن أدخلَ في شرايينِ يَدَيكْ
حتى لا أظلَّ في المنفى

Sunday, February 22, 2009

هـــي







هي الطهر والنقاء .. هي أرض الوفاء
..غرست الحب في قلبي وعلمتني كيف أزرع منه آلاف الورود ..علمتني كيف أصعد على ضفائرها المرخية على قمم الجبال

يوما أمسكت فيه القلم وازدادت كتاباتي
كتبت على أوراقي بعض من كلماتي كلمات ليست كالكلماتي .. تصف بها أجمل أيام حياتي






*************
همســــه

مدونة بنــج
شدني مقال لها يمتاز بالهدوء والطرح القوي


http://bluesbenj.blogspot.com/

Thursday, February 19, 2009

Tea Time



من لا يبعث السرور في مجيئه .. يبعث السرور في غيابه



استوقفتني تلك الحكمة



ماهي كمية الفرحه التي تغمر الانسان لدى مغادرة الطرف الآخر ؟
ولماذا كل هذا السرور؟


أتساءل كثيرا ماهو الانطباع الذي يتركه هذا الشخص عند مجيئه .. وعند ذهابه
لماذا لايكون هذا الشخص يبعث السرور عند مجيئه .. لماذا لا يبتسم ويحاول قدر الامكان أن يكون لطيفا

لماذا لا يحاول أن يترك انطباع جيد .. لدى مجيئه ولدى مغادرته


برأيي الشخصي تتميز هذه الفئه من الناس



بالوجه العابس
الصوت العالي
النظره الحاده
متشائم
كثير التحلطم .. ويعتمد على الآخرين في أعماله
لا يعجبه شيئاَ مهما حاولت إرضائه



ترى هل تعلم تلك الفئه من الناس ما تسببه من إزعاج ونكد ؟

ماهي العوامل النفسيه التي تؤثر على تلك الفئه من الناس .. وتجعلهم يتميزون بذلك المزاج المزعج

ربما هي مشاكل العمل .. أو كثرة الصدمات التي تعرض لها منذ صغره من مشاكل وغيرها
أو أنها محاولة إثبات بأني قوي الشخصيه


مخطىء هذا الشخص اذا كان يفكر بتلك الطريقه .. لأني لا أرى أي نوع من القوه في هذا الشخص .. بل على العكس هو محاولة إخفاء شيئاَ في شخصيته تتجمع بها نقاط الضعف وخوفا من إظهار تلك نقاط أن تظهر في شخصيته فهو يحاول أن يخفيها بوجهه العابس وبصوته الحاد



لنستمتع بهذه الحياة بكل ما فيها من جمال






*******
همســـــه
Live The Moment







Wednesday, February 18, 2009

فــي ليلة مظلــمة






أمس الساعه 1:30 بليل .. سهرانه مع بنات خالتي ومطفين الليتات وقاعدين يطالعون فلم دي في دي
الترجمه لونها أصفر .. بصراحه حدي إنحولت من هالترجمه

أنا أول مره أشوف ترجمه لونها أصفر .. تحول اللي ما ينحول

قلت خل أروح قعد على كتر وأصبغ أظافري أبرك لي من هالترجمه اللي تحول
خلص الفلم وصار صخه في البيت .. وكل وحده تقول سالفه عن رفيجتها مادري أهل رفيجتها وعن الينانوه اللي ابيتهم

بالله هذي سالفه تالي الليل؟؟




المهم والاخت مندمجه بالسالفه سالفة الينانوه .. وشصار في بيت رفيجتها ومن هالحجي
أخوي حده اندمج وقعد على الرموت كنترول .. وفجأه كلهم اصرخوا يمااا

بسبة أخوي اللي قعد على الرموت وصار التلفزيون صوته عالي وايد اخترعنا كلنا على جملة


طلع من البيت شايب شايل شي على ظهره




عقبها صارت الصرخه .. صبغ الأظافر انكت على بجامتي حسبي الله على ابليس وبنت خالتي اخترعت عقب اضحكت ودمووع دمووع دموووووووع

ما عرفنا هذي أي دموع بالله

دموع الضحكه .. ؟؟ ولا دموع الخرعه .. ؟؟

لوول



الحجي انهم يايبين فلم رعب يبون يشوفونه .. انتوا وين وأفلام الرعب وين
خلوا أفلام الرعب حق أهلها .. ينيت أمس





أي على طاري الينانوه

هم مره رفيج أبوي جذي مسولف حق الوالد سالفه من هالطقه .. والوالد الله يهداه ياي الفير مشغل القرآن ومطفي الليتات في البيت حتى صبعك ما تقدر إتشوفه

قعدت من النوم مخترعه

عبالي يوم القيامه .. اخترعت بغيت أبجي لووول
!!

بعد ظلمه وقرآن .. يعني شراح يطري على بالي بالله


أنا بس أبي أفهم شغله وحده بس

ليش ما تحلى سوالف الينانوه الا تالي الليل ؟؟
ولا بالبر؟
ولا لما تكون بالشاليه ؟



*****

همســــه
كانت تلك الليله ليلة سوداء مظلمه مرعبه كاد يقف قلبي فيها

Tuesday, February 17, 2009

مـــابـــي








أبي جو جذي .. مايصير ؟

مابي يخلص الشتا .. مابي مابي










*****
همســـــــــــــه

إمبارح بليل و أنا سهران الليل .. كنت بكلم صورتك
وحدي وجايب سيرتك ويا نجوم الليل يا حبيبي ويا نجوم الليل

Tuesday, February 10, 2009

بـــــــــن







البن هو الحل في حالة اذا كان المزاج مش ولا بد .. ألجأ له .. وأرتاح له

في أول رشفه من فنجان القهوه .. أذهب الى عالم آخر هاربه من عالمي .. أذهب الى عالم أحدد فيه خياراتي وأهدافي وقد أحقق جزءاَ منها


في ثاني رشفه من ذلك الفنجان

أبدأ لعبة كسر القاعده
كسر كل ما يقف في طريقي
كسر كل حاجز كبير لا أستطيع صعوده
كسر كل فكره سيئه محبطه


في ثالث رشفه .. أبتسم

وصلت من خطوه سهله أستطيع تحقيقها في عالم الواقع



خامس رشفه

لا تعليق فيها .. فقط لحظه الاستمتاع في نكهة البن



في سادس رشفه

.. أبدأ بالتحليل

لماذا ألجأ الى البن في لحظة اليأس والفرح ؟؟

في لحظة الفرح .. أستمتع في نكهة البن دون أي تفكير فقط هي المتعه المطلقه بطعم البن اللذيذ وتلك الصحبه الجميله


أما في لحظة اليأس .. ألجأ له للهروب من عالم الواقع


في سابع رشفه

أعود الى عالم الواقع .. لأكتشف .. أن الحياة هي بن مجرد بن

نستطيع خلط تلك النكهات المتنوعه من التوفي و الكارميل والكريمه وذلك حسب المزاج الذي تعيشه في هذه الحياة






******
همســـــــــه

تسألني الناس عني .. كيفها أحوالي
أقول بخير وماني بخير يالغالي


Wednesday, February 4, 2009

إنهيـــار






كآبه أعيش حاليا في كآبه .. مادري شنو السبب صراحه
مافي معلوم .. للحين



مابي أسمع من أحد أي شي .. أبي أعيش بعزله .. وأبي أكون بروحي
مو مستقبله من أي شخص أي نصيحه




بس اللي أعرفه

لما الواحد اتضيق في الدنيا .. وتعصره عصار .. وتصفق في وتكوفنه ومع هذا كله يصبر ويستحمل

بس الصاعقه الكبرى .. وانت في هالحاله وتعال جامل .. إتييني أوامر من الزعيم .. والمقصود به الوالد.. وهذي الأوامر لازم أنا اللي أنفذها لاني انا المغلوب على أمري في اني أروح وأجامل في زياره عائليه

بيني وبينكم المره اللي طافت عدت سويت نفسي مريضه .. بس امس الزعيم شافني أراكض في البيت لوول.. إشلون أمثل مره ثانيه اني مريضه ؟؟


جنها قويه قويه ما تترقع كلش




شنو اهو الانهيار

اهي حاله نفسيه كئيبه يصاب فيها المغلوب على أمره اللي اهو أنا .. تعتبر حاله كسيفه ميؤوس منها صعب علاجها

ما هو الحل يا هل ترى؟؟





******
همســــه


اّذكر أيام حبك ياللي ناسيني
يزيد الشوق يهل الدمع من عيني ..ياخذني الليل لك وأصحا أنادي لك
محتاجلك يا حبيبي لا تخليني

Friday, January 30, 2009

لقـــاء تحــت المطـــر





يأتي بكامل أناقته .. ينظر إليها يداعبها بنظراته يبتسم ويتأملها
هي تنظر إليه بخجل وحب


يلمس يدها ويداعب أصابعها .. يبتسم

هو : ملاكي

تنظر إليه بخجل .. تداعب شعرها قطرات المطر

هي : أحبك

يبتسم .. ويرسل لها قبله في الهواء

هو : أعشق عينيكي .. أحب أن أبحر بتلك العينين


تمسك يده بقوه .. وترسل له قبله في الهواء .. لتأتي قطرة وتأخذ تلك القبله معها

هو : أخذت قبلتي قطرة المطر



ترسل له قبلة أخرى في الهواء .. وتأتي نسمة هواء تأخذ تلك القبله وتطير إلى خده

يغمز لها بعينه .. ليسحبها نحوه ويعانقها ويقبلها .. ويحضنها بين ذراعيه


كان هذا اللقاء تحت المطر







مع تحيات بنات أفكاري المتأثرين بالمطر


*******
همســــــــــــــه


ذوبنـــي الشـــوق يا حبيبـــي