الـــدنـــيا حـــــــــر

حر حر حر .. مشالله شمسنا شنو حارقه

شمسنا قاتله .. لنا الجنه ان شاء الله
قررت أصير من ربع دراكولا أطلع بس بليل .. من تغيب الشمس تشتغل مشاويري
المشكله الهوى الحار لاهـــوب يلفح الويه .. الحمدالله يارب
الواحد يمشي ما في حيل





...

بس حر حر حر : (
أنا هني بديت أحسد الرياييل يا بختكم .. شورت واطلع
مو إحنا لبسنا حوسه
أنا أبي افهم إحنا البنات ليش جذي ؟؟ حوستنا حوسه

لما انروح نتسوق نشتري الاكو والماكو لوول .. الرياييل حدهم اقتصاديين يالله هذي شغله ثانيه بديت أحسد الرياييل عليها لوول



...




سؤال فني
تتوقعون في وسط هالقرارات والمناقشات اللي نعيش فيها
ممكن يطلع قانون يمنع فيه الرجال من ارتداء الشورت والبرمودا في الكويت ؟؟
أدري سؤالي بالصميم


...



ونصيحه في وسط هذا الجو اللاهوبــي .. ترا الشمس إتأثر على البشره بشكل فظيع

الشمس تؤدي الى إسمرار البشره
وتؤدي الى الشيخوخه المبكره .. تجاعيد .. ونمش .. فقدان مرونة البشره
نمو أسرع لبوارد التسرطن .. ويؤدي الى سرطان الجلد .. سم الله عليكم وعلينا منا
تسمم ضوئي وتحسس ضوئي




...

دايما استعملوا .. سن بلوك


مثل مره قلت حق اخوي حط .. سن بلوك شمسنا حارقه جان يقولي أنا ريال
شكوووو ريال .. أدري ريال بابا شكو الرجوله في إن تحمي بشرتك من الشمس القاتله
ابتلشنا بالمراهقين
:)


*******************************************
همســـه

حينما تتوقف روحي عن عشق روحك .. سيتوقف قلمي عن عشق الحروف وتقبيل الورق

الــــــزمــن يحلـــها

وايد أسمع هالجمله الزمن كفيل في حل المشاكل


الزمن كفيل في الألم
الزمن كفيل في حل الحب
الزمن كفيل في حل الحقد
الزمن كفيل في حل الكره
الزمن كفيل في حل الحزن



..



الـــــــــــزمـــــــــــن

لما أسمع كلمة زمن .. أتخيل بر وغبار وشمس

ليش؟؟


مادري !! يمكن لأنها كلمة زمن
يعني فتره طويله وسنين وايده .. مادري أحس كلمة زمن طويله مادري ليش أحس فيها وايد طويله





...


الزمن أحس في آآآه
بكلمة زمن أحس في صرخه مؤقته

بس عدل الزمن كفيل بحل الألم والحزن والمشاكل .. الزمن عباره عن فتره زمنيه تنسيك وتهديك وتخلي اللي مرعليك يكون عادي وايد مو مثل ما مر عليك في أول مره مريت فيها في هالمشكله أو الألم




انزين .. بس مع كل هذا شلون يعني اي مصيبه الواحد يسويها عادي يسامحونها عليها عقب ما يمر الزمن ؟؟؟
..

1 2 3 GO

كانوا يتسابقون
كانوا متحمسين
كان كل واحد فيهم .. الأمل جدامه في الفوز
كانوا يتبادلون النظرات
كان كل واحد فيهم يقول بنظرته .. انا اللي بفوز





فجأه
طاحت .. تعرجبت .. وبلحظه دمعت

وقفت وقالت ماراح انهزم .. وردت تركض وتركض وتركض بس حست إنها تركض بالعكس
كان يطالعها ويضحك
كان متأكد إنه بيفوز


واهي كانت تركض بس قاعده تركض بالعكس مو قادره توصل له ليــــــــــــــــش
مو قادره تتحكم بالاتجاه
مو قادره اتسيطر



بليز بليز أحد يساعدني أبي اعدل اتجاهي بليــــــــــــــــــز.. واكتشفت انها بالاتجاه المعاكس

اهو ضحك ..وحست ان ضحكته شريره

وقفت


قالت : أنا ما أحبك .. ليش جذي اتغش ليش اتخليني امشي بالعكس
قال : لاني الاتجاه المعاكس
قالت : نعم
قال : اي نعم .. انا ما غشيت بس انتي اللي طحتي وفرصتج راحت عليج
قالت : بس مو انا قصدت هالطيحه .. غير مقصوده
قال: بس اهني لازم اتعرفين انج الخسرانه
قالت: تدري انت محد يحبك
قال: ليش
قالت : لانك معاكس .. كل شي بالعكس
انت من ربع خالف تعرف .. وانت من اللي ما يتقدمون انت من اللي يرجعون .. انت من اصحاب الرجعيين والعقول المعاكسه .. وانت مو صوب التطور
قال : انا كل هذا؟؟
قالت : واكثر من هذا .. انت الغش بعينه
قال : حرام عليج ظلمتيني
قالت : انا ما ظلمتك انت غشيتني وخليتني ارجع واكمل سباقي بالعكس .. يعني بدال ما اروح لي نهاية الفوز خليتني أرجع لي نقطة البدايه
قال: ما عندي شي اقوله
قالت : طبعا لانك غلطان


وفجأه قعدت واكتشفت انها كانت طايحه وريلها مكسوره والحوار اللي مرت فيها اهو اهي والاتجاه المعاكس كان عباره عن هلوسه ورغبتها الجامحه في الفوز .. بس مر واحد وابتسم انصدمت تفاجأت ان اهو لا لا لا مستحيل اكيد مو اهو

وخذوها المستشفى واهي ظلت محتاره من اللي شافته


القصه من تأليف وإخراج بنات أفكاري .. ترا اذبحوني هالبنات

;p

فلــــــــــم رعــــــــــب

في كثير من الأوقات عندما نكون في الظلام الحالك .. شديد السواد
تنتابنا بعض التخيلات التي تولد مافي العقل الباطين من أفكار غامضه .. بل وأغلبها مرعبه


أنا مثلا كثير ما أتخيل .. والمشكله خيالي واسع
في وسط الغبار وأنا راده من بيت خالي توني طالعه من باب البيت ويمي اختي
التفت لمحت ريال وشعره كشـــــــــــه


واي مي : يمـــــــــــــــــــا
اختي : إشفيج ؟؟

طبعا من صرختي اختي اركضت قبلي .. يعني ويا وويها بتهديني

واي مي : وين رايحه السياره هالصووووب
اختي : من الخرعه مادري وين صفينا .. يننتيني ليش صرختي
واي مي : شوفي هناك
اختي : وين ؟؟
واي مي : هناك ركزززززززي
اختي : اي شنو في ؟؟
واي مي : شنو شنو في .. ؟؟ شوفي في واحد هناك شعره كشــــــــه اشطوله
اختي : ها ها ها ها ها ها ها ها
واي مي : لا صج حلفي .. اللي يشوف هالضحه يقول ما كانت تركض قبلي يوم صرخت أنا لووول
اختي : صبر هذا مو واحد
واي مي : عيل شنو
اختي : جنه وحده لابسه كبوس
واي مي : أي شي
اختي : تعالي نروح بالسياره نطمش
واي مي : أقووول تالي الليل بتصروعني .. إتوقعين يني ؟؟
اختي : الله الله بديتي اتبدعين .. أقووول امشي البيت لا ابجي الحين
واي مي : لأ لأ هذا شكله واحد مادري إشفيه ماسك الزقاره بيده وماد الايد الثانيه جنه يأشر لنا
اختي : ترا مو وقتج .. حركي السياره يالله يماااااااااااا
واي مي : صبر ركزي شلابس جنه بدله الجكت مشقق؟؟
اختي : والله راح ابجي ان ما حركتي السياره


وفجأه بديت أحس ان السياره تهتز انا واختي من الخرعه ساكتين بغى يوقف قلبي
وفجأه طلع واحد من صوب اختي
وقال : هلــــــــــــــــــــــــــــو

واي مي + اختي : يمـــــــــــــــــــــــــــــــــــــــــــــا

طلع ولد خالتي متأثر بفلم وياي يطبقه علينا :(





لووووووووووووووووول هذا جزء من الموقف اللي صار ويا اختي بالغبار والليل

كثير منا من يخاف من الظلام .. لا انكر اني كنت واحده منهم .. بس بعدين راحت الخرعه وعشت بسلام


.....










سؤالي كالتالي ..

ليش العقل الباطن ما يشتغل خياله الا في الظلمه ؟؟
ليش كل شي انخاف منه نتصوره ونتخيله اول ما يصير ظلمه ؟؟



..


تحليــــــــــــــــل

من القصص الخرافيه اللي نسمعها .. تتسيف في العقل الباطن ولان نسمعها في اي وقت فعادي ما نخاف منها ولا حتى نتأثر فيها
وأول ما إتظلم الدنيا يشتغل العقل الباطن ويطلع الصور اللي رسمها في خياله من القصص الخياليه اللي سمعها وبدا يجسدها على شكل صور عاد وتعالوا شوفوا الافلام اللي تصيرمن خيالات وسيعه تفوق تصورنا




أنا شخصيـــــا

عطوني ظلمه .. أبدع بالخيال وأفلام الرعب اللي يرسمها لي عقلي الباطن .. مع إشوية غبار الله يا سلام على الخيال المرعب اللي أعيشه وأعيش اللي وياي في .

إلـــــــــــى مجهـــــــــــول

فقدتك فقدتك وايد .. أحس إني محتاجتك وأبيك يمي محتاجتك معاي
وينك ؟؟
ليش طولت علي ؟؟
ليش أنا محتاجتك لي هدرجه ؟؟


كل شي فيني يفقدك وكل شي فيني يناديك .. ليش في كل شي يصير معاي أبيك في وياي ؟؟

وايد حياتي فيها أشياء تشغلني .. وساعات أقصد إني أشغل نفسي عنك علشان ما أحتاجك ومع هذا أحتاجك
أحتاجك بحزني وفرحي .. أحتاجك في كل فكره أفكر فيها أحتاج رايك وقلبك وحنانك وأحتاج دعمك وأحتاج شورتك ورايك




..



متى أشوفك ؟؟
ومتى أعرفك ؟؟



فيني شوق .. وفيني هلوسات أبي أسولفها لك






..




وايد أفكر متى إيي اليوم اللي أكون في وياك .. شنو أنا محتاجه للحظه هذي
يمكن أنا محتاجه إني أفكر فيك .. مع إني أكابر على هالاحساس إني ما أحتاجك .. بس هالاحساس أصلا يساحلني ويرد يخليني أفكر فيك




وينك ؟؟

صــــــــــــراع

في كل عائله في مراهقين ومنهم من عدى حالة المراهقه .. تلقا إشوية صراع وطبعا السبب في اختلاف الاجيال اختلاف أشياء وايد بالزمن

بس عاد الاهل ساعات من كثر ما يخافون على عيالهم إشوي يمصخونها ويا عيالهم .. يعني الف قانون في البيت ينحط أنا أدري الحين الكثير منكم آباء وبما اني بنت فيني اشوية صراع تعالوا فهموني لي هالخوف ساعات ينقلب هواش

وليش هالقوانين الشديده ؟؟
ليش وايد ادققوون ؟؟

أنا أدري خوف الاهل على البنت يكون وايد و مركز .. بس الله يهداكم مو جذي
ساعات كثر هالقوانين اللي تنحط تولد انفجار ..


:



تتوقعون لو انكم ضغطتوا على عيالكم وحيتوا لهم الف قانون بيمشون على نفس الطريج اللي انتوا تبونه ؟؟

غلط يمكن يكون العكس .. ممكن يولد انفجار وانحراف بعد


:

التركيز

التركيز وايد على البنت .. الحين احنا بعصر المساواة بين المرأة والرجل
ليش البنت في البيت قوانينها اكثر من اخوها في البيت

لازم اتردين الساعه الفلانيه
لازم تطلعين بهدف .. شنو يعني تتمشين .. ماكو تمشي
و مو مع اي رفيجه تمشين معاها

وايد اسمع سوالف من بنات ممنوعين يروحون المجمعاات .. أمبيـــــــــــــــــــه والله العظيم حرام عليكم ليش ؟؟
جان وأدتوهم يوم انولدت هالبنت المسكينه .. بتحافظون عليها يعني لين اتزوج !! بالله ماتزوجت المسكينه مالها روح مو من حقها اتنفس .. والله أسمع سوالف وقصص من البنات ايضيق خلقي ..



هذي معاناة الكثير من البنات .. طبعا الاهل يخافون اكيد على سمعة البنت عشان جذي كثر ما يقدرون يحكرون البنت .. عشان لي يأ الريل المصون يكون مطمن انها بنت البيت

انزين واهو ؟؟؟؟؟؟؟؟

قز 24 ساعه وفراره .. اوكي مو الكل بس ياجماعه خلونا نتكلم بالواقع المرير اللي انعيشه كلهم جذي يلف وما يبقى مكان مايروح له ولو يقدر بعد يروح القمر مايقصر والله عادي ما عنده مشكله واخته لأ لازم اترد الساعه الفلانيه لازم تنحكر وتطبق عليها قوانين العصر الحجري غلشان لما تتزوج اتصير جاريه

اي صح عادي نسيت ان الرجل الشرقي لو درس بالمريخ يظل مخه مخ الرجل الشرقي اللي ما يعجبه العجب

أطفال المستقبل = دمار المستقبل

عندما يأتي فرد جديد في العائله تكون فرحانه .. وتبتدي هذه العائله إتراقب الطفل واهو يكبر
تراقب تصرفاته وتراقب حركاته وتراقب طريقة الكلام ولفظ الحروف



:


خلونا ناخذها وحده وحده

في شغله باطه جبدي .. يكبر الطفل وفي ناس لا تهتم بتصرفات أطفالها يعني
تلقا الياهل لي شاف واحد مكسوره ريله ولا ايده قاعد يمشي بحال سبيله فجأه تسمع ضحكت طفل ترست المكان وتخلي على قولة المصريين " اللي ما يشتري يتفرج "

ليش يا يبا ليش يا حبيبي ليش تضحك على الناس عييييييييييييييييييييب بابا مايصير جذي بعدين الله يعاقبنا
عبالك ولي الامر يقول حق ولده هالحجي ؟؟

لا طااااااااااااااااف من قلب عادي وكأن شيئا لم يكن .. عادي يمشي مع ولده وجنه العيد


ولا تلقا ياهل ثاني فجأه يصرخ يبي يلفت النظر .. والاهل عادي كووووول حدهم


:


واذا بنتكلم عن حركات الطفل .. فهي حدث ولا حرج تلقا الياهل يركض وقاصد يدعم باللي جدامه
ولا ياهل يتحرش ابمره عيوز مسكينه عساها تمشي .. ايي هالياهل ويخرعها
ولا تلقل ياهل شاف ياهل ثاني وروح طرااااااااق ولا بكس على عين المسكين .. شنو هالاجرام اللي احنا فيه


يعني .. ليش ما يتعبون على عيالهم اشوي علشان يطلع فرد صالح بالمجتمع
ليش تخلونه يطلع لما يكبر واحد عبيط يمشي ويستعبط على الاوادم ولا مغازلجي ما يبقى بنيه ما يتحرش فيها

:


واذا بنتكلم عن الالفاظ هني عاد الصاعقه الكبرى.. تلقاه ياهل عمره 4 و 5 سنين يتكلم كلام ماله داعي ينقال

شدعوه شدعوه راعوا ان في طفل في البيت .. لازم مو اي كلمه تنقال علشان هالطفل ما يلقط كل شي

وفي من يسيىء للأسف للطفل بغير قصد.. يعني يستعمل طفله كأداة للمغازل عاد انتوا ادرى وفاهمين قصدي
اتوقعون هالطفل ما يفهم !!

يمكن اهو مو عمر يفهم ومايفهم اهو بعمر ان كل هالصور والتحركات اللي اتصير وياه اظل لمن يكبر في عقله الباطن وبالتالي ينعكس سلباَ على الطفل


وبجذي هالشخص أساء لنفسه وللطفل اللي وياه


والله مادري منو اللي يبيله تربيه .. الطفل ؟؟ ولا الاهل ؟؟