Thursday, May 29, 2008

لحــــظة هـــــــدوء




بينما أرتب أوراقي في غرفتي التي تعم بالفوضى .. وإاذا بسكون يعم الكون


توقف الزمن
توقفت الساعه
توقف كل شيىء على وجه الأرض
توقف العالم بأكمله
توقفت الحياة
توقفت الأنفاس
توقفت الأصوات

:


كل ما أشعر به هو عباره عن هدوء .. هدوء ساكن يكاد يصيبني بالجنون
:

وفجأه رأيت قلعه كبيره تضجها الموسيقى الصاخبه .. والتفت من حولي واذا أنا في بستان كبير تحيطة الزهور في كل مكان

واذا بي أرتدي فستان أحمر اللون ... استغربت

أين أنا؟
ماالذي يحصل؟
ما هذه القلعه؟
ولماذا أرتدي فستان أحمر اللون؟


:

إستهوتني تلك الموسيقى الصاخبه .. فذهبت الى القلعه واذا برجال ونساء يرقصون على تلك الانغام
ثم أتت فتاة جميله وقالت لي مارأيك أن نشرب شيئا .. استغربت وابتسمت ابتسامه خفيفه
فسألتها : من أنتي ؟
قالت : أنا فكره
استغربت !!
قالت : نعم أنا فكره من أفكارك الجميله اللتي تحلم بفارس الاحلام
واي مي : اها

ثم أتت فتاة أخرى أمسكت بيدي
وقالت : تعالي معي لنرقص
فسألتها باستغراب شديد : من انتي ؟؟
قالت : أنا أيضا فكره من أفكارك الطموحه التي تحلم بوضع بصمة في عالمها المهني
ثم أتت فتاة ثالثه
وقالت : مابكم أيها الافكار مزدحمين عليها دعوها تستوعب أن هذه الحفله هي حفلة أفكارها وتلك الموسيقى الصاخه ماهي الا صرخه بداخلها
دعوها تعرف بأن جميع الفتيات هنا ماهي الا افكارها المزدحمه فقاطعتها
وقلت لها : مهلا مهلا اذا كانت كل تلك الفتيات هي افكاري .. من هم الرجال ؟؟
قالت: تلك خيبات الامل .. ولكن لاحظي بأن عدد الفتيات يغاب عدد الرجال الموجودين
واذا بفكره أحضرت لي كوبا من الماء وقالت دعينا نتكلم عن مستقبلنا مستقبل الأفكار


:


شعرت بالماء على وجهي .. واذا بأمي تقول واي مي هل انتي بخير
حينها أدركت بأن تلك الحفله هي حلم حلم جميل
تلك الحفله الصاخبه ماهي إلا أفكار مزدحمه تدور وتدور في رأسي



:

وشعرت بارتياح كبير جدا لان العالم لم يتوقف وتلك اللحظات لم تتوقف .. كما أن أفكاري لم ولن تتوقف

Sunday, May 25, 2008

فــي حـــــوار ســــاخــر مــع الحــــظ



ملاحظة : هذي قصه من وحي الخيال .. من بطولة بنات أفكاري
;p

كان ياما كان في قديم الزمان كانت واي مي تتمشى .. وفجأه عثرت وطاحت بس لحسن الحظ ماكان في أحد موجود
المهم كملت طريجها وراحت الجمعيه واهي ماشيه قاعده اتنقى الاغراض كان في يمها واحد وايد طويل ومن غير ما يقصد بعربانته دز عربانتي وطاح وانكسر كل شي

فكان شعورها بالخجل واحمرار الوجنتين غالبين عليها .. لانها دخلت في دوامه اللي صار فيها فجأه يأ واحد وحاسب على كل شي واخذ اغراض واي مي و وصلها لي سيارتها

واي مي : أشكرك على مساعدتك لي بس عفوا انت منو ؟؟
الشخص : أنا الحظ
واي مي : عفوا
الحظ : إي انا حظج اللي دايما معاج وفي كل مكان أكون وياج
واي مي : صبر ها ها ها ترا انا مالي خلق استعباط بليز عن الغشمره
الحظ : أنا حظج و موقاعد استعبط واي مي
واي مي : أخاف المارد وقاص علي ماتبي اطلب منك شي
الحظ: لا يبا

واي مي : زين ليش طلعت لي ؟ وشنو الهدف ؟؟
الحظ : طلعت لانج دايما .. إتذميني
واي مي : كنت تسمعني ؟؟
الحظ : اي كنت اسمعج وانتي تتحلطمين وتقولين كله من حظي
واي مي : أسفه
الحظ: لا تتأسفين
واي مي : زعلان مني ؟؟
الحظ : أنا زعلان عليج
واي مي : ليش ؟؟
الحظ : الحظ يا عزيزتي مجرد هاله صغيره اترافقج ممكن تكون وياج وساعات اتكون عكسج بس مو معناه إن كل شي تبينه يتححق لج ويكون بين ادينج
واي مي : في ناس دايما حظهم معاهم
الحظ : أكبر غلط هالجمله
واي مي : ليش ؟؟

الحظ : هذا مو الحظ .. هذي نفسيتهم وشلون اهمه متقبلين الواقع ومتعايشين معاه ومقتنعين فيه
واي مي : ممم وشنو مشكلتي انا الحين وليش انت طالع الحين ؟؟
الحظ : أبي اقولج ان ساعات لما يكون الحظ عكسج .. يعني هالشي اللي تبينه مو بصالحج
واي مي : هذا حجي مأخوذ خيره
الحظ : لا يا يبا لا يا يبا لا تقولين جذي .. ياما ناس حظهم وياهم بس مو كل شي عندهم ينسلب منهم شي .. في شي اسمه نصيب وقناعه ولا زم الواحد يتعايش معاه
واي مي : عدل أعرف واحد من الاصدقاء قالي جمله
You have to make deal with life
الحظ : وهذا اللي نبي نوصل له
واي مي : حاولت اطبقها بس مادري
الحظ : ماكو شي اسمه مادري
فجأه واي مي واهي قاعده اتبطل باب السياره .. كانت في سياره ماشيه بسرعه وكان في ماي اشوي بالمسافط وفجأه الماي كله صار على واي مي

الحظ : لوووووووووووووووووووووووووووووووووول
واي مي :تضحك بعد
الحظ : ما ني قادر انتي حالتج كسيفه ها ها ها ها ها ها

واي مي : مو البركه فيك .. وانت مو موجود وحالتي كسيفه .. هالمره طالع لي تتوقع اشلون بيكون الوضع؟؟
الحظ : ها ها ها ها ها
واي مي : أنا أقول فارج مابي أشوفك


هذي نهاية القصه في النهايه .. أنا أشكر حظي وايد وايد اللي خلاني أكتب هالقصه .. وأحب أشكر الصديق اللي عطاني نصيحه وايد حلوه

ويا جماعه ترا القصه خيالي في خيال مو تمسكونها علي .. اعرفكم شماتين
:p

Thursday, May 22, 2008

مشــــروع


في لحظات الصفاء أسرح في تفكيري و أروح بعيد

أروح حق مدينه منعزله.. هالمدينه عباره عن نادي يشمل كل أساليب الترفيه والتعليم
بتقولون لي شلووووووووووون ؟؟
بقولكم
هالمدينه فيها
مطاعم وكوفي شوب وشاليهات
وفيها نوادي رياضيه وملاعب كرة القدم والسله والهوكي وسكوارش وحمامات سباحه
هالمدينه أطل على البحر .. فيه مرسى حق الطراريد واليخوت والجتس كي
لاني مو ناسيه الحداقين :)

وفي كلاسات
للموسيقى دروس للبيانو والجيتار والكمان كل أنواع الموسيقى
و في دروس للمسرح وفي مسرح كبير راح اقول لكم هالمسرح حق شنو في اخر البوست

وفي كلاسات
للشعر والدروس الادبيه وكلاسات في اللغه الايطاليه والاسبانيه

وفي قسم حق سباقات السيارات والسياكل مو ناسيه أحد أنا :)

هالمدينه الكبيره شنو فيها
فيها ستاد حق المباريات بين الافرقه .. وفي مسرح كبير .. حق شنو المسرح؟؟

هالمسرح في اخر كل سنه انسوي في حفل تكريم حق الاعضاء المميزين والمجتهدين

هالمسرح في اخر كل سنه انسوي في حفل تكريم حق الاعضاء المميزين والمجتهدين


يتضمن الحفل .. مسرحيه من تأليف الاعضاء المشتركين + الموسيقى اللي ألفوها الاضاء المشتركين
وشعر بالاضافه إلى الانشطه المعتاده في أي حفل بالنسبه للحداقين لهم نشاطات ايضا في الحفل واكثر واحد مميز في مسابقات الحداق واللي مشتركين في سباق السيارات والسياكل لهم ايضا نصيب من التميز في هالحفل السنوي



والهدف من هالحفل السنوي اهو التعاقد مع شركات الاعلانات مع النادي من خلال التعامل مع الاعضاء المصممين المميزين ويشتغلون ويا هالشركات اللي تتعاقد ويانا ويكون جذي وصلنا حق هدف من من اخلال الاشتراك في هالنادي اهو توظيف هالاعضاء المميزين هذي نقطه

النقطه الثانيه
التعاقد مع وزارة التربيه مع النادي في اشتراك طلاب الجامعات والمدارس وذلك لشغل وقت فراغهم وانتاج عنصر فعال في المجتمع عنده خبره فعاله في المستقبل

النقطه الثالثه
التعاقد مع الشركات من خلال تدريب الموظفين .. هني عاد على حسب نوع الشركه اذا كانت شركة اعلانات
نعطي دورات للموظفين دورات مو موجوده في العالم العربي كلش ونتعامل بالساعات من خلال هالتدريب
واذا كانت شركة استثمار
نعطي الموظفين دورات مكثفه عن كل شي جديد في عالم الاستثمار ... الخ من الشركات و أنواعها

طبعا هذا كله نتعامل معاه من بعد التعريف عن نفسنا في أول حفل سنوي يقوم به أعضاء النادي

تدرون شنو ميزة هالنادي او المشروع اللي انا راسمته في خيالي هو كالتالي

تنبني مستشفى يتعالجون فيها بس الاعضاء والمدرسين عن طريق ابراز البطاقه اللي ادل على ان هالشخص اهو مشترك في هالنادي

خصومات في كل المطاعم والكوفي شوبات والفنادق اللي برا الديره وذلك عن طريق ابراز البطاقه ايضا

خصومات في المحلات بعد من ملابس وغيرها حتى المجوهرات فيها خصومات

بتقولون أوووووله من وين كل هالفلوس عشان انسوي هالمدينه العجيبه اللي فيها كل هالانشطه والخصومات والحفل السنوي التكريمي

بقولكم هالنادي للنخبه
اشتراك العضو بالسنه 750 د.ك
وعمل خصومات للاعضاء اللي يشتغلون مع الشركات اللي نتعامل معاها

والاعضاء اللي يتكرمون في الحفل السنوي راح يصيرون موظفين معتمدين في النادي وبدال ما يصير عضو في يصير موظف فيه ويمشيله معاش بالغض النظر عن عمره وبغض النظر على ان كان يدرس في جامعه او متخرج
لان المميز يستاهل هالتكريم

لو تخيلتوا معاي هالمدينه .. والاعضاء اللي مشتركين فيها شنو راح تنتج من شباب فعال بالمجمتمع يشتغل ويتعلم ويجتهد ويتكرم
تتوقعون حق أي مستوى يوصل له هالعنصر الفعال في المجتمع

هذا اهو خيالي تصدقون عاد عندي دراسات جدول حق هالنادي .. بس ماني عارضتها اخاف تنباق فكرتي
:p

تتوقعون عقب هالبوست ينعرض علي
Business
:p

Sunday, May 18, 2008

الــــذوق العـــــــــام


حفاظا على الذوق العام .. يتوجب علينا مراعاة الذوق العام

جذي وانت ماشي مستانس بدنيتك .. اتصادف ولا ابويهك واحد رايح يسحب فلوس من البنك بدشداشة النوم
ولا واحد رايح مركز سلطان بالبجامه

اووو صبــــــــــر صبـــــــــــــر

وين الذوق وين الاناقه ماله داعي الواحد يكشخ لي بغى يروح البقاله او الجمعيه بس هذا ذوق عام
يعني لازم الواحد يحترم الناس اشوي في اللبس في الاماكن البسيطه حتى

مره كنت زايره اهلي قلت خل امر البقاله مع اخوي ولا واحد سافط لابس بجدامه بجــــــــــــامه .. ما يصير
والله مو منظر حضاري .. الواحد يظيق خلقه
احس العين تنجرح يعني اهو الواحد لازم يعطي صوره حلوه عن نفسه حتى لو رايح الجبره

المظهر نصف الشخصيه يعني الواحد من غير لايتكلم من غير ما تعرف اللي جدامك مظهرك اهو اللي يحكم عليك قبل انت شنو

سمعت مره سالفه إن موظف مارضى يمشي معاملة حق عميل والسبه ان كان ياي ابدشداشة البيت يراجع البنك
فتحولت السالفه للمدير..يقول الموظف الحين أنا كاشخ حق منو مو حق العميل ؟؟
ليش هالعميل ما يحترمني ويلبس عدل وهو ياي يراجع معاملته

أدري المسألة مسألة ذوق واختيار وكل واحد حر باختياره .. ولولا تعدد الأذواق لبارت السلع
بس لازم الانسان يراعي مسألة الذوق العام .. الواحد مايدري منو بيصادف بالطريج

يمكن شريك العمر
يمكن شريكة العمر
:p

أو يمكن واحد من ربعك
أو يمكن واحد من المدونين
:p
وفي النهاية مظهرنا يعكس احنا منو يعكس شخصيتنا ويعكس ديرتنا .. فالنحافظ على الذوق العام

Thursday, May 15, 2008

لا تقفـــل الأبــــواب


قال أحد العلماء
كنت أسير في طريقي فإذا بقاطع طريق 'لص' يسرق الناس، ورأيت نفس الشخص 'اللص' يصلي في المسجد، فذهبت إليه وقلت: هذه المعاملة لا تليق بالمولى تبارك وتعالى، ولن يقبل الله منك هذه الصلاة وتلك أعمالك
فقال السارق: يا فلان، بيني وبين الله أبواب كثيرة مغلقة، فأحببت أن أترك بابا واحدا مفتوحا
قال العالم : بعدها بأشهر قليلة ذهبت لأداء فريضة الحج، وفي أثناء طوافي رأيت رجلا متعلقا بأستار الكعبة
يقول: تبت إليك.. ارحمني.. لن أعود إلى معصيتك فتأملت هذا الأواه المنيب الذي يناجي ربه، فوجدته 'لص الأمس فقلت في نفسي: ترك بابا مفتوحا ففتح الله له كل الأبواب
إياك أن تغلق جميع الأبواب بينك وبين الله عز وجل حتى ولو كنت عاصيا وتقترف معاصيَ كثيرة، فعسى باب واحد أن يفتح لك أبوابًا.
:)

Tuesday, May 13, 2008

الله يرحمك..


اللهم اغفر له و ارحمه و عافه و اعف عنه
و أكرم نزله ووسع مدخله و أغسله بالماء والثلج و البردو نقه من الذنوب و الخطايا كما يبقى الثوب الأبيض من الدنساللهم ثبته عند السؤا ل اللهم نور له قبره اللهم وسع له قبره اللهم اجعله روضه من رياض الجنة ولا تجعله حفرة من حفر النارو اسكنه فسيح جناتك ... برحمتك يا ارحم الراحمين
الله يرحمك .. ويغمد روحك الجنه

Sunday, May 11, 2008

عطـــــوه فــــرصه


بتكلم عن واقع يظيق الخلق .. عن واقع ما اتمنى ألد اعدائي ينحط فيه واهي انك ادور وظيفه
يتخرج الطالب وكله أمل بوظيفه كشخه ومعاش عالي عشان يكشخ ويشتري سيارة عمره
يتفاجأ المسكين إن عادي يقعد في البيت وطول معاه سالفة انه يدور وظيفه .. يطق كل البيبان
ولما يروح يقدم يتفاجأ .. والله ماعندك خبره

اي انا توني خريج اشلون .. اكيد ماعندي خبره
اي انا مستعد اتعلم .. شدعوه
لا احنا مالنا خلق انعلم من اول ويديد .. نبي ناس عندها خبره
اي الخبره على عيني وراسي .. بس اخذوا طاقة شبابيه تعطي وتبدع في مجال العمل
عطوا هالشباب فرصه يبدعون ويوسعون دائرة النجاح

خليهم ينطلقون
خليهم يبتدون من الصفر
خليهم يعرفون معنى الفلس
خليهم يبنون نفسهم
خليهم يفرغون طاقتهم بشي مفيد
عطوهم مجال للابداع والعطاء في مجال العمل ..مساكين ما يبقى باب ما يطقونه الا سدوه ابويهم
ويقولون ليش الشباب ينحرفون
مو انتوا سكرتوها ابويهم مره وحده

ليش انتوا تعطون فرصه
ليش انتوا تفهمون
ليش انتوا اتحسون
ليش انتوا ما مريتوا في هالمرحله والمفروض انكم تتفهمون
ليش مو من حقهم انهم يبنون نفسهم مثل ما بنيتوا نفسكم
ليش .. وليش..وليش

شفيها اذا كانوا يدرسون ويبون يشتغلون .. بالعكس هذا شي وايد حلو بالدول المتقدمه كل شبابها جذي
ليش هني لأ
ليش هني مايعطون فرصه حتى يفهمون هالشباب

معارض التوظيف كله جذب .. ما ياخذون الا ولد فلان .. ترا هذي حركه يديده
شدعوه تبون تخطبون انتوا ولا توظفون .. انا اعرف شقاعده اتحجى عنه وعندي ناس ينسقون هالمعارض الفاشله
وفي شركات ما توظف الا بالواسطه .. يعني الحين الخبره ما تترس عينك لازم واسطه


ليش كل الوظايف اللي ما ابيها يبوني ... وليش الوظايف اللي ابيها يطولون معاي
ليش وانا قاعده اكتب هالبوست وانا معصبه .. ليش .. ليش .. ليش

Saturday, May 10, 2008

تعبـــــــت


في زمن المظاهر وين موقعنا من الاعراب
سالفة المظهر صار فيها تحدي .. بكل شي السياره في اللبس و في أثاث البيت حتى في التعليم
أنا بالجامعه الفلانيه أدفع بالكورس .... د.ك اغلى يعني أكشخ .. لاوالله
تعال ستوووووب شنو أكشخ

لأي مستوى احنا وصلنا له .. صارت منافسه
أنا ما اأقول إن المظاهر مو مهمه ..لا مهمه وغلطان اللي يقول عكس هالحجي
لان المظهر نص الشخصيه .. لكن انك توصل لمرحلة التبذير والصرف مادري أحس انها وايد صعبه
أنا أعترف أنا وحده من محبين المظاهر بجميع أشكالها .. في اللبس في الاثاث في الاكسسوارت
ومدمنه على التسوق ولازم يكون عندي فكره عن كل شي يديد
بس مو لدرجه اني اشوف الاغلى يعني الاكشخ ساعات يكون في شغلات سعرها معقول وكشخه

ساعات أحس اني تعبت من هالمنافسه ... اي نعم تعبت من منافسة المظاهر
بس ما أقدر إحنا في مجتمع يفرض عليك انك إتجاريه في المظاهر
إتقول رفيجتي عقب ما تزوجت... أنا بديت أحس اني أشتري أشياء ومالها داعي
ما أحتاج لها بس عشان جدام الناس أنا عندي

وتعليقي أنا على هالموضوع .. ليش يا يبا الله رزقنا لازم انحافظ على هالرزق ونصرفه في الاشياء اللي نحتاجها
مو العكس
وهم وحده من رفيجاتي تقول ما أقدر ما أجاري مع اني مو محتاجه و عندي بس مطره ساعات اصرف اكثر عشان أكون غيروأنا تعبت من الصرف
وتعليقي أنا على هالموضوع ... أمبيه ما ألوم الشباب لما ما يتزوجون صج البنات مصرف

ليش بدينا نتشيحط .. ليش وصلنا لي مرحلة التبذير .. حرام والله
عن نفسي أنا تعبت من هذي المنافسه .. بس شنو الحل ما أقدر ما أجاري أنـــا تعبـــــــــــــت

Friday, May 9, 2008

قهـــــوتــــي


أنا مغرمه من الطراز الأول .. أنا عاشقه متيمه في حب قهوتي
أدمنت الهروب من واقعي إليها.. وأسافر لها

مع قهوتي أحس بأمل
مع قهوتي أحس بالقوه
مع قهوتي أروح في عالم الخيال
مع قهوتي أحس إني أميره
قصتي مع قهوتي قصة حب فريده من نوعها.. ما تحلى قعدتي الا مع قهوتي
إتشاركني أفكاري وأحلامي و همومي و هلوساتي و أفراحي
إذا كنت فرحانه كانت معاي .. وإذا كنت حزينه كانت معاي
رفيقة دربي وصديقة عمري قهوتي
قصتي مع قهوتي وهني طبعا اقصد التركش كوفي وايد احبها بدت معاي وعمري 20 سنه ولي اليوم انا مدمنه وعاشقه من الطراز الاول .. اي مكان أروح له يكون طلبي الأول قهوتي عقب اطلب مني اللي تبيه

مو غريبه .. لما تحس بوحده شديده بس اطلبها استانس
مو غريبه .. أبيها بكل مناسبه
مو غريبه .. إدماني عليها .. وهني ما أتكلم عن نفسي في ناس وايد مدمنين عليها
مو غريبه .. تعطيك انطباع بتحسين المزاج
معاها أحس بحلاوة الدنيا .. حتى لو ظايق خلقي
معاها أحس في لذة الفرحه.. معاها أنا ملكه
ما أدري ليش أحبها

وهنا أقتبس هذه الأبيات للشاعره.. هبه الصباغ

مالك يا قلمي .. هل أنت ضيعت درب الكتابه
تبحث عن سطر ..تخط فيه حروف البلاغه
من أين تبدأ..هل نسيت عنوان المقاله
أعتذر منك.. سأضمك بين الاصبع والسبابه
وسأجعل لحبرك نكهة قهوة الصباح المحتاره

أنا منك وأنت مني .. وكلانا عابس في وجه الحضاره
أكتب برفق فبين .. أسطري أريد ألف عباره
هل تقرأ مابين السطور..أم أنك تجهل معاني القراءه
مع قهوتي أروح لعالم الأحلام أكون في أنا البطله

Wednesday, May 7, 2008

كـــلام فـــــي الحــــب



الحـــــــــــــب

تجربة وجودية عميقة تنتزع الإنسان من وحدته القاسية الباردة لكي تقدم له حرارة الحياة المشتركة الدافئةتجربة إنسانية معقدة … وهو أخطر وأهم حدث يمر في حياة الإنسان لأنه يمس صميم شخصيته من وجوهره ووجوده … فيجعله يشعر وكأنه ولد من جديد

وهو كالبحر حين تكون على شاطئه يقذفك بأمواجه بكرم فائق يستدرجك بلونه وصفائه وروعته ولكن حين تلقي بنفسك بين أحضانه لتبحث عن درره يغدر بك ويقذفك في أعماقه ثم يقذف بك وأنت فاقد لإحساسك

لا ينطق عن الهوى وإنما هو شعور وإحساس يتغلغل في أعماقنـاالحب مرآة الإنسان يعكس ما بداخلنا من عمق الوصف والخيال

الحــــــــــــــــب

كأحلام على ارض خرافية يلهينا عن الحاضر يشدنا ويجذبنا فيعجبنا جبروته بالحب نحيا فهو الروح للجسد فلا حياة بدونه وهو الأمل الذي يسكن أنفاسنا ويخاطب أفكارنا ليحقق آمالناهو سفينة بلا شراع تسير بنا إلى شاطئ الأمـان، سماء صافيه وبحراً هادئ وبسمة حانية، يزلزل الروح والكيان ويفجر ثورة البركان

أخيراً الحب أسطـورة تعجـز البشريـة عـن إدراكهــا إلا لمن صــدق في نطقهــا ومعناهـــاالحب يقرء والحب يسمــع والحب يخاطبنــا ونخاطبــه يسعدنــا ونسعــدهوهو عطـراً وهمساً نشعـر بسعادتـه إذا صدقنـا في أقوالنـا وأفعالنــابالحب تصبح الحياة جميلة لكي نحقق أهدافــاً قـد رسمناهــاولكن ما يقلق العاشقين فقط هـــو احتمال أن تكـون الأقـدار تخبئ لهـم فراقـاً لم يكن في حسبــان أي منهــم

Sunday, May 4, 2008

فلســـفة الـدمعـــــه


عندما يتألم القلب لجرح نازف.. لايغسل ذلك الألم ويشفيه
إلا دمعةٌ تنزل على الخدِ
كأنها تواسي صاحبها .. وبلسم لجروحه
لا بأس غداً سوف يكون أفضل
عندما تندم النفس على فعلٍ قبيحٍ .. لاتجد لها مفر من تلك
الدمعة التي تكون رساله صامته ..إنني نادمٌ على فعلتي .. وأطلب الصفح والعفو ..فأنا ليس من صفاتي الكمال
عندما نحزن .. تلك الدموع التي كالسيل ..ماهي إلا دواء شافي لغسل القلوب من حزنها وكدرها ..وان حُبست كأنما هي .. كقتل للنفوس .
عندما نفرح .. ليس لدينا رساله لشدة فرحنا إلا دمعة ..فرجت أسارير القلب .. ولها العين تَبْسُمُ قبل الشفاه ..رسالتها فرحتي وبهجتي ..أشد ان تتسع لها فقط الشفاه .وان تفكرنا بأحوالها قلنا …سبحان مبدع خلقنا
حياتنا كلها دمعة ..تلك القطرةُ …قطرة الماء مالحه ماهي إلا دليل على انسانيتنا .. فمن خلت عيناه منها .. فل يقم جنازة قلبه .. ومن رآها ضعف وانكسار للنفس ..فاليعلم المسكين ..أنه حرم نفسه من نعمة لم يعرف من بعدها .. معناً ..للحزن
…. للفرح … للألم … للندم …
من منا .. من لم يرى دمعه .. وتبادر عيناه بإنزال الدموع .. وكأن حال لسانه يقول .. مازلت انسان ..أتألم ..وأحزن .. لحال غيري
عجيبٌ حال تلك الدمعة .. والأعجب حالنا معها ..
ولكن .. ان تفكرنا بها وتأملنا.. بعدها قلنها بشفاه باسمه
ماأجمل الدمعة

Thursday, May 1, 2008

حـــــــــوسه


أفكاري ...حوسه
ظروفي ...حوسه
بيتنا...حوسه
الانتخابات...حوسه
المدونين...حوسه
;p
أكيد بتقولون شفيها شسالفتها؟ ليش محتاسه ؟ وحايستنا معاها؟
خـــــزنــــي وخـــــزك
ظاهره مؤذيه يا جماعه ذاك اليوم رايحه كوفي شوب وياي جريدتي مستانسه والدنيا حلوه وطلبت قهوتي ييت اشرب ولا احس واحد خزني خزه خطيره... جان اعطيه خزه عنيفه
عقب اخترع ولف ويهه شنو هذا وبعدين يعني الواحد مايعرف يشرب قهوته لا صواعق خزززز فوق راسه حتى في المطاعم.. اهم شي اهم شي حتى بالممشى ياحليلهم والله طلع الممشى حق القز والتسليه .. حاله كسيفه والله
إنــــــــت واجـــــــــد هيـــلو
المغازل انتقل عند الهنود.. رحت كوستا ذاك اليوم قاعده اطلب قهوتي ولا يقولي انت واجد هيلو يعل ما تحلالك كرهت كوستا والله


تعــــــــــارف
ذاك اليوم دق تلفون الوالده ولا مس كول .. شسالفه !! تليقفت ودقيت عليه لان الرقم خارجي

واي مي : ألوو
المتصل : هلا والله
واي مي : منوو معاي
المتصل : آنــي من العراق
واي مي : نعم خير
المتصل : أأأأأ تعارف
واي مي : شنو
المتصل: آنـــي أريد أتعرف
واي مي : أي شي أي شي .. توووووووووووووت .. وسكرت التلفون
الاخ يبي يتعرف.

وقول للزمان إرجع يازمان... دا كان زمان يازمان