في كل عائله في مراهقين ومنهم من عدى حالة المراهقه .. تلقا إشوية صراع وطبعا السبب في اختلاف الاجيال اختلاف أشياء وايد بالزمن
بس عاد الاهل ساعات من كثر ما يخافون على عيالهم إشوي يمصخونها ويا عيالهم .. يعني الف قانون في البيت ينحط أنا أدري الحين الكثير منكم آباء وبما اني بنت فيني اشوية صراع تعالوا فهموني لي هالخوف ساعات ينقلب هواش
وليش هالقوانين الشديده ؟؟
ليش وايد ادققوون ؟؟
أنا أدري خوف الاهل على البنت يكون وايد و مركز .. بس الله يهداكم مو جذي
ساعات كثر هالقوانين اللي تنحط تولد انفجار ..
:
تتوقعون لو انكم ضغطتوا على عيالكم وحيتوا لهم الف قانون بيمشون على نفس الطريج اللي انتوا تبونه ؟؟
غلط يمكن يكون العكس .. ممكن يولد انفجار وانحراف بعد
:
التركيز
التركيز وايد على البنت .. الحين احنا بعصر المساواة بين المرأة والرجل
ليش البنت في البيت قوانينها اكثر من اخوها في البيت
لازم اتردين الساعه الفلانيه
لازم تطلعين بهدف .. شنو يعني تتمشين .. ماكو تمشي
و مو مع اي رفيجه تمشين معاها
وايد اسمع سوالف من بنات ممنوعين يروحون المجمعاات .. أمبيـــــــــــــــــــه والله العظيم حرام عليكم ليش ؟؟
جان وأدتوهم يوم انولدت هالبنت المسكينه .. بتحافظون عليها يعني لين اتزوج !! بالله ماتزوجت المسكينه مالها روح مو من حقها اتنفس .. والله أسمع سوالف وقصص من البنات ايضيق خلقي ..
هذي معاناة الكثير من البنات .. طبعا الاهل يخافون اكيد على سمعة البنت عشان جذي كثر ما يقدرون يحكرون البنت .. عشان لي يأ الريل المصون يكون مطمن انها بنت البيت
انزين واهو ؟؟؟؟؟؟؟؟
قز 24 ساعه وفراره .. اوكي مو الكل بس ياجماعه خلونا نتكلم بالواقع المرير اللي انعيشه كلهم جذي يلف وما يبقى مكان مايروح له ولو يقدر بعد يروح القمر مايقصر والله عادي ما عنده مشكله واخته لأ لازم اترد الساعه الفلانيه لازم تنحكر وتطبق عليها قوانين العصر الحجري غلشان لما تتزوج اتصير جاريه
اي صح عادي نسيت ان الرجل الشرقي لو درس بالمريخ يظل مخه مخ الرجل الشرقي اللي ما يعجبه العجب
9 comments:
life is not fair
yah not fair at all
زرع الثقة في الابناء
وتحفيز الرقابة الذاتية
بديل تربوي عن القوانين الصارمة
من الحكمة مراعاة البيئة المحيطة
لا يبا بهالسوالف مافي مساواة
اي صح لازم قوانين ماعندنا بنات يفترون بالشوارع لي تالي الليل .. كفو كفو
لا وبعد مراهقه وتبينهم يطلعون لا ماكو زين يسوون فيهم
ومع هذا حتى الشباب المراهقين لازم يكون عليهم رقابه
هالزمن يخرع
وبلا مساواة ولا بطيخ مساواة بالحياة السياسيه انما بالحياة الاجتماعيه عاداتنا وتقاليدنا تحكم
كل شي بحدود ..
ومسألت البنت تقعد لي تالي الليل بره البيت غلط ..
الزمن يخوف والناس صارت تخوف ..
يعطيج العافيه حبوبه ..
تقبلي مروري ..
kuwait
السلام عليكم
اختي , بهالوقت انتشرت الجرائم بشكل كبير , للأسف بعض الشباب ما صار عندهم غارية على البنات , عكس قبل ايام ابهاتنا واجدادنا كانوا يحرسون بنات الفريج ويخافون عليهم ام الحين فهالشيء موجود
لا اتلومينهم اختي وهم بعد مايصير البنت اترد بوقت متأخر الا ويكون معاها يا زوجها او اخوها لكن بروحها صعبه
لاتنسين اختي ان البنت معما كانت تضل ضعيفة جدام اي موقف
الاساس الاعتدال بالتربية اهيه المطلوبة ولا تنسين ان البنت جوهرة ودائما الجوهرة يحافظون عليها ويخافون عليها من الناس :))
محسد
عدل كلامك
..
مهندسنا
انطرني عند الشبه فيني هوشه وياك لوووول .. شنو كفو كفو
انا ضد الاضطهاد
;p
كويت
كل شي بحدود بس ساعات الاهل يمصخونها
..
سم ون كويتي
عدل كلامك وعجبني تعليقك البنت جوهره
غلبتني بتعليقك
العزيزة واي مي
تربية المراهق..سواء فتى أو فتاة من أصعب مراحل التربية والتهذيب
كان الله في عون المربّـي
بالنسبة للفتاة...فقوانينها الخاصة والمختلفة عن الفتى تحتمها قواعد المجتمع...فنحن جزء من مجتمع ولا يمكن أن ننسلخ عنه
ستقولين هناك أخطاء..وسأرد عليكِ..بأنني اتفق معكِ
وهذه الأخطاء لايجب أن تعدل أو تصحح على حساب نظرة المجتمع للفتاة
ولكن
يجب أن يكون التغيير على ديناميكية بطيئة جدا حتى لايحدث خلل أو فجوة تسيء للفتاة في ظل مجتمع اختلطت فيه بعض مفاهيم الجاهلية!؟
مع ملاحظة التالي
من المعلوم أن الشاب كثير السفر والقز غير مرغوب به عند الكثير من العائلات المحافظة مما يعني أن حتى الشاب تكون عليه ملاحظات تقيده كثيرا
وتحياتي الخالصة لكِ
المحــــــــــــب/
شــقـــــران
اشكرك شقران
بس ترا في ظلم انا اشوف
انا ما قلت ان البنت خل تسهر لي تالي الليل او اتقز مثل الريال بس الزمن تغير ولازم اشوي تتغير هالقوانين
Post a Comment