التخطيــــط الفــــاشـــل

في بداية كل رحله او طلعه حلوه جذي تكون مخطط حق هالطلعه وشراح تاخذ ومنو راح يكون وياك
هذا كله تخطيط سليم




الافـــراد
لمن اتقرر منو راح يطلع وياك هالطلعه الحلوه اللي تحتاج انك ترتاح فيها نفسيا .. تلقا واحد نط لك يقول لأ مو عاجبني

نعم شنو !! عفوا منو طلب رايك ؟؟

الحين ما يحمد ربه هالشخص ان ضمن قائمة المسموح لهم بالطلعه وياي لووول



غير جذي .. اللقـــــــــافه
مو شي اللقافه والله لما يروح هالملقوف اهو يخطط شياخذ أغراض ويحدد بعد اشخاص زياده جنه الحين اهو صاحب الفكره




هـــــــــــــــــــوشه
وعقب اتصير الهوشه لوووووول .. تبدأ الحرب ... لما اتصير الهوشه على النقاط الرئيسيه وهي المكان وين في ومنو الاشخاص اللي يوا زياده على القائمه المحدده ... عقب تدرون شنو يصير


انهون ونقعد في البيت احسن .. وهذا اللي انا اسميه التخطيط الفاشل .. من الافضل انك تتبع احدى الخيارين اذا كنت تبي رحله حلوه سعيده بعيده عن الناس

يا انك ما تخطط
او اتخطط وماتقول حق احد كلش وتطلع بروحك .. اونس بصراحه لووول

وفي النهايه احب اختمها في مقوله شهيره ماشيه على هالتخطيط .. اتفق العرب على الا يتفقوا ..




وشكرا جزيلا لاستماعكم
واي مي
من جزيرة يويشان
****************
همســــــــــــــه

أنا ترا برحل على كيفي وهواي

بــــــوسـت مــــزاجـــي

لحظــــــــــات السعــــــــــاده


اكتشفت شي .. ترا السعاده مو بالفلوس ولا اني اروح المكان الفلاني اللي ابيه

لا لا طلع معناها اعمق من جذي ابوايد.. السعاده عباره عن لحظات صغيره اتمر اتكون سعيد فيها بس اذا زادت هاللحظات صارت حدها عاديه علشان جذي دايما ركزوا على اللحظات الصغيره ترا اهي كبيره

طلعت السعاده ذواقه

;p













مـــــــــــــزاجي تعبـــان





انا هابه هبه في البيت مالي مزاج مالي خلق .. مالي خلق اشوف احد ومالي خلق اكلم احد ومالي خلق اشبك
ومالي خلق اكل ولا لي خلق اطلع ومالي خلق انام ولا لي خلق اتكلم ولا لي خلق اتسوق





لاعت جبدي زين وبعدين شسوي ؟؟
كله مالي خلق مالي خلق مالي خلق مالي خلق








جان اكتشف شي
امي اتقول انتي انولدتي وانتي مرفقه كلمة مالي خلق .. طلع من صغري ووانا مالي خلق لول حاله كسيفه










مخــــــــــــــــدتي



اتقول امي وانا صغيره كنت احب مخدتي وايد وايد وين ما اروح كله ماسكتها المهم .. زارتنا عمتي و ولدها نام على مخدتي وانا ماكنت ادري ان الاخ نايم على مخدتي .. ولما شفته نايم على مخدتي جان أركض و أركض وأركض وأركض وأسحب المخده من تحت راسه



وطبعا اهو انكفخ راسه عقب ما شلت المخده احسن محد قاله ينام على مخدتي .. يا زيني مجرمه سلم قلبي خلني لامي





***************

فــــــــــلاس
بلوق عمتي قالي مره .. شنو هالانتاج الفكري
فحاشني شلل فكري
كله منك لوووووول

بصــــراحه أحـــرجنـــي

أمس كان لي اخر يوم في دورة الريكي . وهي دوره مثل اليوجا لكن مو يوجا
لمن تاخذ هذي الدوره تقريبا اتحس انك ترى الامور او المشاكل الشخصيه من منظور آخر
اهي دوره روحانيه اكثر يجتمع كل من فيها وهدفه هو رؤية الحياة بطريقه مختلفه

كنت انا مع بنات خالتي في هالدوره وكان في قروب ناس بعد ما اعرفهم كلش طبعا كان مختلط يعني شباب وبنات واقصد بشباب كلهم رياييل كبار دكاتره و مهندسين لان هذي الدوره اكثر اللي اييون لها وياخذونها اهي ناس عارفه قيمتها ومحتواها الروحاني والفكري بعد





نبذه صغيره عن الدوره

عباره عن عدة جلسات مصحوبه مع موسيقى روحانيه مع انفاس عميقه واضاءه خافته وبعدين نبتدي انشوف وين المشاكل اللي احنا نبي نتخلص منها .. مع كل هذا هالة الجسم ( اللي اهي الطاقه ) ترتفع وتقوى عندك ..ومضمونها مع المحاضرات وايد وايد قوي وهادف وقلت لكم هذي الدوره اصلا ما تستهوي اي شخص الا اذا كان عارف قيمتها







أمس كان اخر يوم لي في هذه الدوره .. واصلا ناس وايد ما ا عرفهم هناك بعد المحاضره..... وكنت قاعده مع بنت خالتي اشرب قهوه ونسولف


ولا فجأه يت لي باقة ورد باسمي ومعاها بطاقه مكتوب فيها

أهديك شعرا أم أهديك باقات من الورد ولو أن الورد سيغار من جمالك ويخجل أن ينظر إليك


بصراحه بصراحه بصراحه .. أنا ما توقعت كلش كلش هالحركه الحلوه اللطيفه من شخص ما اعرفه كلش من شخص كان يشوفني ويراقبني كل هالوقت وانا ما ادري من شخص كان يسمع كل كلمه اقولها .. وايد استحيت وايد مادري شنو الشعور اللي ياني امس بس حسيت اني سندريلا ... حساافه ما قدرت اصور باقة الورد والبطاقه لاني نسيتها في بيت خالي يوم تيمعنا : (

المشكله ان امس كان اخر يوم في الدوره وطرش لي الورد .. يمكن كان قاصد ان يطرش الورد في اخر يوم بالدوره علشان ما اعرفه
عموما انا من خلال البوست حبيت اشكره على الباقه الجميله التي جعلتني اخجل كثيرا وفي نفس الوقت افرح كثيراوبعد هالحركه يديده يعني شبابنا موراعين ورد لول
هذه الكلمات هي اهداء له وشكر .. ولو ان حتى ما يدري عن هالبوست
ان تهت بنظرة عينيك لا تقاطع شرودي
فأكون حدائق الورد بينهما أبحث عن سر وجودي
في البعد أتوق لسحرهما .. ولقاءك يصبح عيدي
رسائلي فاضت في قلمي .. ضاعت في الصوت قصيدي
وعيوني رسمت بوح الصدر .. سكنت في الصمت عقود





فــــــــلاش
وانا طالعه ومستانسه امس .. عثرت وطحت طيحه مسنـــعه : (

آآآه مـــن تلـــك اللــوحـــــه

تلك اللوحه
أخذتي تلك اللوحه .. إلى عالم وحيد
تلك اللوحه أخذتني .. إلى عالم كئيب
عالم قد أكون فيه وحيده .. عالم مليىء بالوحده

إسم تلك اللوحه .. ألم الوحده .. أشعر بها ولا أنكر أنني أخاف منها




استغرقت في التفكير
متى يكون الانسان وحيد ؟؟
عند فقدان الاهل .؟؟
أو الاصدقاء؟؟
أو الحبيب ؟؟



تلك الوحده أشغلتني في التفكير .. وفي البحث عن تلك الاسئله اللي تدور وتدور في رأسي

آآآآآآه كم أنا حزينه على تلك اللوحه .. كم أنا خائفه منها في نفس الوقت
أشعر برغبه كبيره في البكاء .. أصرخ ليصل صوتي الى السماء
ما أصعب أن تتكلم بلا صوت .. وأن تحيا كي تنتظر الموت
تواصل طريقك بلاهدف.. بلا شريك
تلك اللوحه أثارت خوفي .. وأخذتني الى عالم وحيد
آآآآآآآه من تلك اللوحه




وليعـذرني أخـوي المــدون العـزيـز
Salah
على استعارتي لتلك اللوحه .. التي اثارت الشجون وليعذرني صاحبها الفنان المجهول الذي لا اعرفه


************************
همـســــــــــــــــه
أنـا قلبـــــي تــرا تحــول

حـــوار مــع الكـــــي بــورد - 2

دخل أخوي الصاله وانا احاجي الكي بورد.. طبعا الكي بورد من الخرعه سكت

انا حدي كنت منصدمه ومنصعقه


اقووووووووووووول يالاقرع
( طبعا الاقرع اخوي لووووووووووووول )

الاقرع : شتبين
واي مي : شرايك نتراهن
الاقرع : على شنو ؟؟
واي مي : اي اهم شي على شنو .. ممممممم على لاب توب يديد اوكيك
الاقرع : مسرع طاح لاب توبج من عينج
واي مي : لا لا لا والله ما تدري شسالفه
الاقرع : ليش اشصاير ؟؟
واي مي : اول شي تعال معاي الصاله
الاقرع : ليش خل انتحجى هني
واي مي : لا لا مابي الكي بورد يسمعنا
الاقرع : شنو اي شي اي شي
واي مي : انا سمعته يحاجيني .. صدقني
الاقرع : اختي ينت واقعدت
واي مي : ليش مو مصدقني ؟؟ ترا على فكره اهو يخاف من قرعتك لوووووووووووووول
الاقرع : بعد الحمدالله والشكر .. انزين ابي اسمع يالله خليه يتحجى
واي مي : ممممممم هذي يبيلها خطه ترا لازم انعذبه عشان يتحجى
الاقرع : شلــــــــــــــون.. وناسه يبيله قعده هذا .. صبري صبري خل اييب الكاكاوو والبيبسي وادق على رفيجي اكنسل الطلعه



طبعا انا واخوي الاقرع حدنا مجرمين وبنبدع في الكي بورد عشان يتحجى



واي مي : اقول
الاقرع : شنو قولي
واي مي : ترا اهو يكره اظافري .. ومايحب نقرق وايد بالمسنجر
الاقرع : خووووووووووووووش عيل .. سمعي انا بعلق بظل ادوس انتر وانتي لوعي جبده بأظافرج ها ها ها
واي مي : امبيه شنو انت مجرم
الاقرع : طبعا طبعا افا عليج .. الحين يالله خل يتحجى هذا


ونطيحله
جك جك جك جك وانتــــــــــــــــــــــــــــــــــــر جك جك جك جك جك جك جك جك جك جك

الاقرع : شوفي صارلي ساعه لاعت جبدي مو راظي يتحجى .. ترا انتي مينونه
واي مي : لا لا يتحجى
الاقرع : خل ناخذه محل كمبيوتر نعذبه اشوي ها ها ها ها
واي مي : لوووووووووووول يالله فوقه

ركبنا السياره .. ورحنا المحل

الاقرع : يعطيك العافيه
العامل في المحل : اهلا اهلا اتفضل حضرتك
الاقرع : عندي مشكله جنه الكي بورد يتحجى
العامل في المحل : يت ايــــــــــــه يتيتيتحشى
الاقرع : شنوو ها ها ها ا انت شايف ويهك وانت اتقول يتحشى
العامل بالمحل : الله بأ هو انت حتهزأني .. ربنا يسمحك
الاقرع: لا والله ما اطنز بس طافك ويهك وانت اتقول هالكلمه طافك حسافه ما صورتك
العامل في المحل : اكيد وشي احلى من أرعتك يالاأأرع
الاقرع : شنووووووووو ان ما كسرت راسك في اللاب توب الحين واخليك اتسوي عملية تجميل حق ويهك العوي ما اصير الاقرع

لاااااااااااااااااااااااااااااااااااااااااااااااااااااااااااااا




العامل في المحل : ايه ده هو الصوت طلع منين ؟؟ هي أرعتك بتتكلم
الاقرع : جب انت مال ايي بيوم واكسر المحل كله فوق راسك بس اصبر علي



من وين هذا الصوت ؟؟

طلع هالصوت من اللاب توب .. طلع هذا الكي بورد اخترع من الهوشه وكان الاقرع بيحذفه بالعامل ومن الخرعه صرخ


ساعتها اقتنع اخوي ان الكي بورد تحجى .. رجع اخوي السياره وقالي




الاقرع : طلع يتكلم كنت بفلعه بالريال جان يخترع وتكلم
واي مي : وانت وين ما تروح بس تبي تفلع الاوادم
الكي بورد : الله يهداك الله يهداك يالاقرع .. ليش تبي تفلعني بالريال ؟؟ يا اخي احذفه بتلفونك
الاقرع : لا لا التلفون ما يفلع .. انت تفلع عدل
الكي بورد : صج مجرم
واي مي : طالع هذا ماخذ راحته ويانا .. ما تحجى انت منوووو وشكو اتحجى ولا بكسرك الحين

الكي بورد: بصراحه بصراحه هذا اللاب توب قبل لا تشترينه كان مصنعه واحد داش جو كله يحضر ارواح ولما كانت الارواح تطلع انا عثرت وطحت على لاب توبه ودشيت في وماني عارف اطلع منه :( شسوي بعمري ؟؟ وانتي ويا اخوج الاقرع بس تبون اتيننوني واطفروني .. وانتي بالذات حدج باطه جبدي ويا اظافرج و ويا ربعج بالمسنجر طايحتله جكجكه يبا اشوي اشوي على الكي بورد فقصتيني لعنتي خيري
واي مي : امبيه ما كنت ادري ان لاب توبي مسكون كسرت خاطري بس خلاص لا تزعل ولا يهمك راح ادلعك بس اظافري ماني قاصتهم لووول وابي كل ما ادش اشبك واحد ينرفزني ويبط جبدي انت شوف شغلك وياه واعفس كمبيوتره فوق تحت فاهم ولا ترا بكسرك وبتكون نهايتك على ايدي

الكي بورد : اوكي اتفقنا مجرمه مثل اخوج الاقرع

وانتهت القصه عاشت واي مي مع اللاب توب المسكون .. وسوته هكر حق اي واحد يبط جبدها وينرفزها
;p


كالعاده القصه من تأليف وبطولة واخراج .. بنات افكــــاري

*************************
همســـــــــــــــه

دنيتي قربك هواك .. كان عنواني خذتني مني معاك وقلت انساني
كيف انساك وانت ساكن وسط وجداني ؟؟

حــوار مـــع الـــكي بـــورد

في يوم حلو العصاري جذي .. بطلت لاب توبي وبديت أدش السايتات اللي احبها
حبيت أجيك على ايميلاتي

وخطر ابالي ادش المسنجر علشان اجيك منو شابك : )









واندمجت





جك جك جك جك ( يعني قاعده اكتب : ) )
جك جك جك جك جك جك



















بـس بس بـــــــــــــــــــــــس




ولين شنو هالصوت

لا ماكو شي خل اكمل




جك جك جك جك جك جك جك جك








بس أقولج بــــس بــــــــــس













واي مي : منوووووووووووو
الكي بورد : انا : )
واي مي : بسم الله الرحمن الرحيم
الكي بورد : لووووووووووووووووووووووول
واي مي : هي هي شنو لوووول .. صبر لحظه بسم الله ترا مو مستوعبه
الكي بورد : لا بابا استوعبي لعنتي خيري وانتي طايحتله جكجكه تقرقين ويا ربعج
واي مي : وانت شكوووووو هاااااا كلك كي بورد
الكي بورد : بس شنووو ذبحتيني شنو هذا اشوي اشوي
واي مي : ولين انا ادري هاليوم ما راح يعدي
الكي بورد: انا من زماااااااااااان كان ودي اتحجى بس
واي مي : بس شنو ؟؟
الكي بورد: خفت من اخوج الاقرع
واي مي : شنو ؟
الكي بورد : اي خفت من اخوج الاقرع يحذفني .. اذا كلمتج
واي مي : لووووووووووووووووول
الكي بورد: تضحكين !!
واي مي : اي عادي يحذفك اهو واحذفه اهو وراك لوووووووووووول
الكي بورد : عن الملاقه
واي مي : ترا ما بقى الا الكي بورد يقولي مليقه
الكي بورد : لو سمحتي ممكن طلب
واي مي : ممممم شنو ؟؟
الكي بورد : قصي أظافرج ذبحوني
واي مي : شكوو انا قاعده اكتب بأناملي
الكي بورد : اي بس اظافرج اتنرفزني .. و صابغتهم بعد عشتووووو
واي مي : يومك اسود هين



يتبـــــــــــــــــــــــــــــــع


*******************
همســـــــــــه
يا عديم الشوق بعدي فيك ما أثر .. لو أغيب العمر كل العمر أو أكثر

طـــراق + جـــم طــراق = طــراقات

ينولد الانسان و هو حده ملقوووووووف بس يبي يعرف الدنيا

بس يبي فلوس
بس يبي يوصل
بس يبي يبي يبي يبي

لي متى وهو يبي ؟؟


لما يموت وهو يبي











مايدري ان الدنيا كله طراقات في طراقات













الطراق الاول

ان مو كل شي يبيه يحصله
تجري الرياح بما لا تشتهي السفن

عاد الانسان دايما سفنه ما تشتهيها الرياح .. للاسف







الطراق الثاني

يدرس ويحط طموح جدامه ما يدري ان لو يدرس ويحط طموحه بالثلاجه وايد ابرك




الطراق الثالث

يتخرج مسكين يقدم وظايف بشركات مسنعه .. مايدري ان هالشركات تتشرط عاد لازم انت من ولده وشنو عايلتك اهم شي رايح يخطب مو يتوظف .. الحمدالله والشكر






الطراق الرابع

لما يحب الانسان حبته القراده زين .. لازم اتصير مصيبه اتخلي هالحب فركش فركش









فاصل طاروقي

اخوي الصغير عمره أربع سنين هاب هبه في البيت .. يقول متى ينزل عندنا ثلج يبي يلعب مع
Snow man

مسكين اخوي ما ابي اصدمه واقوله حبيبي مستحيل ينزل ثلج هني حدنا مطر وبس وايد علينا
ترا هذا يا حلوين يعتبر طراق : )







و نعود للطراقات


الطراق الخامس

الزواج .. أذونا ان ما تزوجنا قالولنا لا لا لا حبيبتي لازم اتزوجين لازم اتكونين اسره .. ما يدرون ان هالاسره فيها جم طراق






الطراق السادس

يكسر خاطري الريال لما يتزوج تطلع له مصاريف ما تخطر على باله كلش .. وهذا يسمونه طراق الزواج
لوول




الطراق السابع

لما يكون عند هالانسان صديق صدوق رفيجه روح بالروح على قولتهم .. وفجأه يكتشف ان هالرفيج مصلحجي
هذا طراق قوي قوي




الطراق الثامن

ان لما اتكون امور وايد وايد مهمه ونطمح ان انطورها .. وللاسف نلتفت حق السوالف التافه



الطراق التاسع

اللي يدش جامعه خاصه ويكشخ اول جم سنه وبعدين .. اييه طراق مسنع ان متى يتخرج ؟؟ ولي متى بيظل يدفع هالاموال الطائله .. على قولت اخوي انا على هالفلوس جان باني بيت وشاريلي طياره لوووووووووول


الطراق العاشر

الجذب .. طفارتي الجذب وكل انواع الجذب تدرون ليش؟؟

لان كل جذبه بطراق للاسف









واخيرا

اللي عنده طراق يتفضل ولا يستحي .. واللي يبي يزيد الطراقات هم انا ما عندي مانع
مدونتي مفتوحه لكل طراق من كل مدون






************************

همســـــــــــه
أنا توني على طاريك فزيت

مــن وإلــــى الطبيـــــعه

أمس قاعده احوس بالقنوات الفضائيه ولا اشوف .. مريم نور

منو مايعرف مريم نور ؟؟
مريم اللي تنادي للطبيعه ..

لفت انتباهي .. في انها كانت اتقول ان في وحده اتصلت عليها وقالت لها مريم
انا قريت كل كتبج بس ما حصلت وصفه اتوقف سقوط شعري
فكان رد مريم .. انشالله بيهر شعرك ( في اللهجه اللبنانيه )


ردها كان جذي .. كانت تقصد انتي موفاهمه انا شقاعده اتكلم عنه مع انج قريتي كل الكتب






مثل ما نقرأ مابين السطور .. لازم نفهم كلام مريم مابين السطور او بالاصح ما بين الكلام والحجي اللي اتقوله
اهي

حلقه اللي شفتها ما بقى احد ما طبت في لوول فظيعه





بس بيني وبينكم .. المايكروبايوتك
لا يعني العوده الى الجاهليه بتاتا .. كانت تتكلم عن ملاحظات في الكل اللي تاكلونه في الهوا اللي تتنفسونه
في العطر اللي ترشونه.. ترا كلامها عدل


وبعدين في شغله
كل ما اروح مركز سلطان .. وادور سوالف طبيعيه اشوفها اغلى من اللي فيها مواد كيميائيه ليش بالله ؟؟
خو طبيعيه مو محتاجه اضافات ؟؟


ليش اغلى ؟؟
ليش يخلون الناس تاخذ البضاعه اللي فيها تكرير وفيها اضافات كيميائيه ليش ليش ؟؟


اللجوء الى الطبيعه .. مريم نور ما تقصد .. ردوا نفس قبل
اهي تتكلم عن العلم الهندي والعلم الصيني .. هذا العلم مأخوذ تقريبا من الهنود الحمر جزء منه مو كله عاد مادري هذا اللي انا فهمته

عجبني الموضوع وايد تدرون ليش؟؟

رحت كذا جلسه للريكي مثل اليوقا بس مو يوقا.. لقيت في هدوء وصفاء
لقيت في الفوضه والازعاج اللي داخل الانسان كله يروح .. فمابالك ريكي + مايكروبايوتك اكيد الصحه بتصير وايد زينه
وايد فيها توازن


انا ضد اي واحد يقول ان مريم نور .. تهاجم المسيح او الاسلام او من الحجي .. لازم تفهمون اهي شنو قاعده تقصد و منو اتخاطب

عموما انا انصحكم بهذا السايت عجبني وايد وايد واتمنى ان الكل يدخله ويقراه ..


http://www.mariamnour.com/index.php?area=articles


وعجبني وايد في كلامها عن صيدلية الروح

*************************
همســـــه
لحظه من عمري معاكم .. تسوى عندي كل شي ماهو مني من غلاكم أغلى من روحي علي

ويــــــــــن أروح ؟؟

قبل جم يوم كنت راده البيت حزة المغرب .. وشفت اخوي قاعد يسفط سيارته

طبعا سفطت سيارتي ورحت له



أمشي وأطالع ولا ياربي ليش يبتسم ؟؟

وكملت أمشي صوبه





ولا أخوي شفيه صار حلوو ؟؟


عادتا أخوي كله اقوله يالجيكر .. هذا مو جيكر











عقب ما قربت بس مووو وايد إشوي بس .. جان أكتشف الطعنه الكبرى إن مو أخوي طلع ولد يرانا شاري مثل سيارة أخوي










أمبيه أمبيه
أمبيه شسوي بعمري ؟؟




أمبيه أمبيه








وين أودي ويهي انا طبعا خذيت فوق تحت لوووول ويهي احمــــــــــــــر ابي الارض تنشق وتبلعني ودي أبجي من هالموقف اللي يفشل
وطبعا الاخ مستانس حده .. عادي يوزع ابتسامات .. وانا مو قادره أمشي لوووول









رديت البيت وسولفت حق أخوي .. جان يموووووت من الضحك .. حقدت عليه بصراحه
وماني قادره اطلع من البيت خايفه أشوووووووفه شلون يعني أتنكر ؟؟
لووول




****************************

همســـــــــــــــه

حالتي كسيفه .. ماعندي همسه

:(

أنا كنت .. بس

ليلة شديدة الظلام .. جالسه استمع الى اغنيتي المفضله وحدي في البيت
أتأمل الظلام الحالك .. الذي يسكنه الهدوء

كان هدوء يشعرني بالخوف .. لا أعلم لماذا
هدوء يسكن البيت .. وكأن العالم بأسره توقف








..





وإذا بطيف
طيف وكأنه خيال .. أصبت بالخوف والذعر
كما أنني كنت أراقبه


وإذا بالطيف يحاكيني ويقول

الطيف : مابالك جالسه وسط الظلام؟
واي مي : لا أعلم لا بد أنه الهيام
الطيف : ولماذا كل هذا البؤس والظلام ؟؟
واي مي : أحتاج الى أن أكون أنا .. كما أنني أحتاج الى هذا الظلام
الطيف : ولماذا الظلام ؟
واي مي : أصبحت أرى كل شيىء ظلام
الطيف : لماذا البؤس يافتاة ؟
واي مي : لابد أنه الانكسار .. لابد انه الاحباط .. لابد انه الامل الضائع
الطيف : اذهبي الى النور .. فلا يوجد مكان لكي هنا
واي مي : لماذا يا طيف .. فقد أحببت سوادك وظلامك وهدوئك
الطيف : ان ما تعانينه .. يعانيه كل انسان فلا يوجد حياة اذا ما وجدت تلك العثرات
واي مي : أريد الظلام .. فقد أصبحت عاشقة له
الطيف :اعشقي واحبي النور فهو الامل فهو الحياة وان كانت فيه تلك العثرات



واي مي : لا أريد





وهي تصرخ








لا أريد لا أريد لا أريد







بعد ذلك أخذت بالكأس وترمي به تلك الحيطان .. كما اصبحت تصرخ بأعلى صوتها لا أريد لا أريد








واذا
























واذا


















واذا




بالوالد يستيقذ من النوم تملأ عيناه الغضب .. ورغبته في خبزي و تكسير شراعي


وهو يقول
الوالد : انتي شفيــــــــــــــــــج
واي مي : أأأأأأأأأأأأأ ... أنا .. أأأأأأأأأأأأأأأأأأأأأأ

الوالد : يه تحجي
واي مي : كنت .. ك ك ك ك ك ك ك ك .. كنت
الوالد : كنتي شنو يننتيني








واي مي : كنت أمثل دور مسرحيه واندمجت
;p
طبعا الوالد كان ودة يحذفني من الدريشه .. بس قلبه ما يهون عليه عبورته انا : )





***********************************************************

همــســــــــــه
قلــــــــــــــبي يعـــــــورني

الـــــــــى مــن كســــر قلبــــــــي

كم تجرعت لوعة الحنين إلى همساتك...كم عانقت الشوق في غيابك وزرعت أمل لقائك بعد رحيلك لم أعداشعر بما حولي .... جعلت الصمت مجدافي..ذكريات الماضي تعصرني وتجعلني أتعثر في مسافاتي...ترتمي أفراحي حزينه في أحضان الشوق

رحلت وثارت براكين الشوق بداخلي واهتزت أركان فوادي.. رحلت فأمطرت سحابة دمعتي وتكثف ضباب حيرتي رحلت ومازال طيفك يزورنيفيلهب مشاعري ويؤجج نيران اشتياقي لك ويثير أمواج هيامي

حبيبي في ليلة اشتقت اليك لمخاطبتك

لمناجاتك لهمسك وضحكك

لأني أحبك حتى الوجع لأني أحبك حتى النزف لأني احبك حتى الأنسحاق لأني أحبك حتى الانصراف التام لأني أحبك حتى الصراخ لأني أحبك حتى الاستلاب لأني أحبك حتى الهذيان لأني أحبك حتى الهلوسةلأني أحبك حتى الجنون لأني أحبك حتى المرض اللذيذلأني أحبك حتى انهيار اللحظة في دوامة الفراغ لأني أحبك حتى إنكسار المسافات

لأن إنتظاري لك يبدأ قبل افتراقنا بهنيهةلأن كتاباتي فيك ، مسطحة أمام حضورك البهي لأن ما أقوله ، عقيم أمام صمتك العميق لأن حلمك بي ، أروع من كل تصاويري لأن ضعفي يولد ، بعيداً عن التصاقي بك لأن هاتفك الصباحي صار انشدادي الى الصباح لأن شرودي عن محارتي ، دليل على حضورك النابض في شراييني لأن غيبوبتي إليك ، سكنى الهدؤ في أعصابي لأني لم أعد أشبه أحدلأنني الصدى لصوت كان لي ، ومسحتنيه لأني صرت أنزل عن التفاصيل ، كما الرذاذ عن ورق الشجرلأنك منحتني نعمة السعادةلأنك علمتني قراءة السكوت لأنك علمتني الصمت حين بي رغبة في الكلام لأني كل هذا ولأنك أكثر بعد من كل هذا ، فلا تحصرك لغات الشعوب ولأنني صرت أتنفسك فلن تنفصل عن نبضي أكرسك حبيبي مدى الحياةفامنحني العمر الثاني لأحيا فيك وأحيا منك وأحيا بك إلى الأبد

********************

همســـــــــــــــــه

{ عمري .. ماحبيت كلمة }' إنتظار 'إلا ..يوم إني ' عرفتك 'عشت معنى الـ ' إنتظار 'ذبت فيه .. و .. ذاب فينيو.. صرنا واحد ..!!نعشقك .. ليل و نهار ..بعدها .. طبعاً .. دريت ليه جيت ..؟!وليه قلبي... بـ كل بساطه !! كان واقف فـ انتظارك ..؟!!يحتري .. بردك ..و نارك ..يحتريك وانت مافكرت..
لحظة تحتريه

يادي سنوات الضياع ..ماني قادره

تكفا تكفا .. عفيه قولولي شلي عاجبكم في ؟؟
خبيتونا بسنوات الضياع
انتوا شايفين شواربه ؟؟
إتييب المرض لوووووووول اهو بكبره اييب المرض

أنا وحده ما شفت هالمسلسل ولا حلقه منه .. ويوم قررت أشوف نص حلقه جان اتلوع جبدي ما استحملت








شسالفه ؟؟













أروح الصالون .. يتكلمون عنه
أروح المستشفى .. يتكلمون عنه
أروح أتسوق .. هم أسمع ناس يتكلمون عنه
بنات خالتي .. يتكلمون عنه
يرانا .. يتكلمون عنه







زين كل هذا وانا للحين ساكته


أبطل المارينا اف ام .. هم يتكلمون عنه





لا لا لا لا لا لا لا
والله انتحر جذي


المسلسل ملييييييييييق .. شنو عاجبكم في ؟؟


المسلسلات التركيه إشتغل سوقها .. ولا تقولين لي اي اي انتي اتشوفين نور علشان جذي ما تحبين سنوات الضياع على الاقل نور الابطال يترقعون .. بس سنوات الضياع لأ تكفا بليز البطله حلوه بس البطل لأ لأ بموووت
زين قولولي شنو قصته
;p



بس شواربه لا تصير موضه ويقلدونا اللي عندنا .. ترا من الحين انا اعتزل الزواج لوول

**********************
همـســــه
للعيون لغه لا يفمها الا المحبين يخيم الصمت فيها عندما تبدأ بالكلام